Paulina Ndalikokule
ONGWEDIVA – Ohashi kala oshidhigu kaalongwa yokiiputudhilo yopombanda ya tsakanithe oompumbwe dhawo unene tuu ngele inaya za momagumbo gaakuluntu haya longo.
Molwoondando dha londa dhokufuta oohiila, iikulya, olefa osho wo iizalomwa okutumbula po ashike yimwe osha thindile kongudhi aalongwa Elifas Kleopas (26) naImmanuel Daniel (25) ya tote ongeshefa opo ya vule okukwathela aavali yawo nokufuta oompumbwe dhimwe.
Daniel okwa ti okwa tamekele okulanditha uumbindja mo2017 manga a li ta endulula iilongwa ye koNamcol, ta ti okwa li ta nyengwa okumona omakwatho ngaashi naanaa aagundjuka oyendji ihaya mono omakwatho ngoka oshoka inaye shi enditha nawa mondondo 12.
“Ohe landa ashike okambindja inaaka shangwa sha ngame tandi gwedha ko oshilimbo sho ‘be patient’ tandi ka landitha kondando yagwedhwa,” Daniel ta ti. Kleopas oku na uunongo wokuthaneka iilimbo yoongeshefa osho wo okunyanyangidha omathano ga yooloka, nokuninga oopolohalama oshitalendi shoka i ilongo kuye mwene manga a li omunasikola.
“Ethimbo lyandje lyopaumwene ohandi lyi longitha okutota iilimbo andi tumine omahangano nuuministeli ngele oye yi panda taye tu lombwele, ashike oyendji ihaya galula,” Kleopas ta ti.
Kelopas naDaniel oya kala nokutsakanena mositola yokunduluka iihako sigo ya uvathana okutula ongeshefa yimwe mo 2022 yo ‘Be Patient’ moka haya landitha uumbindja nokunyanyangidha iilimbo.
“Otwa tokola okulanda omashina getu yene opo tu kale hatu nyanyangidha iilongomwa yetu yene, twa longitha iimaliwa mbyoka hatu pewa kuNsfaf,” ya ti.
Taya ti ohaya longele mondunda yawo moka haya zi ongombelewa yawo, ya pondola nookuli okukuta aantu yaali ya gwedhwa po.
“Nkene twa totele ongeshefa ndjika inatu indila nenge tu pewe iimaliwa yasha kaakuluntu, otse hatu ya tumine,” Kleopas ta ti.
Taya ti oya pondola okunyanyangidha uumbindja wokampeyina yomipevipresidente Netumbo Nandi-Ndaitwah osho wo okunyanyangidha iilimbo dhoopolohalama dhiinyangadhalwa ya-IUM.
Taya ti ohaya tsakaneke uupyakadhi waantu inaya hala okufuta nawa, okuyekwa iimaliwa osho wo aantu taye ya sheke. Oya tsu aanyasha ooyakwawo omukumo ya ningi kehe shoka taya vulu okwiihuma komeho.
“Inatu kaleni ashike twa tegelela okupewa nenge okudhiladhililwa ko, iimaliwa ohatu yi pewa ashike ohatu yi zala po ashike nenge tu yi makite po pehala lyokutota uungeshefa wu tu kwathele,” ya ti ngaaka.
Ngashiingeyi Daniel omulongwalongi koshipitudhilo shoUnam mOngwediva e li komvula ontiyali manga Kleopas a mana omuvo gwa za ko uulongi ko-IUM, nonando kashi shi oshipu okukala omunasikola nomunangeshefa itaya sholola mwaayihe.