Paulina Ndalikokule

Omukiintu gwoomvula 54 okwa holoka mompangu yamangestalata gwaKahandja ohela sho ta fekelelea edhipago kumwe nomahepeko gomomagumbo, sha landula sho anuwa a henge nokudhipaga noshitenda ohonda ye, omukulupe omulumentu gwomivo 69.

Shi ikwatelela kolopota yopolisi, omupevikomufala Kauna Shikwambi okwa ti otaku okololwa kutya oshiningwanima shika shi nyanyalithi osha ningwa pokati kEtitatu nEtitano pethimbo kaali shiwike pegumbo lyawo moka ya li haya zi molukanda loR5 Camp mOkahandja.

“Otaku hokololwa kutya omukiintu nguka okwa dhenge omukulupe ngoka noshitenda olutu aluhe sigo omeso. Shikwambi ta ti mbaka yaali kakwa li yahokana paveta ashike oya kala pamwe uule woomvula o20.

Ta ti nakusa okwa tongololwa onga Paulus Michael, olutu lwe olwa falwa koshipangelo shomomudhingoloko talu ka ingilwa omakonakono, aampambele yanakusa oya tseyithi lwa nal e nomakonakono gopolisi otaga tsikiletsikile.

Moshiningwanima sha yooloka moKuisebmund omulumentu gwomivo 47 Omunamibia okwa hulitha eso lyombaadhilila sha landula uusiku (wEt i tano) wokunwa omalovu.

Shikwambi okwa hokolola kutya ongula yEtitano sho omulumentu a yi pondje okwa gwile pevi, anuwa okwa kwathelwa kusuala naakwanezimo yalwe oku mu tumbila mondunda ye yokulala.

“Otaku hokololwa kutya anuwa sho suala she e keya e mu tale lwopotundi 06h00, okwa adha a hulitha nale, ta lopotele opolisi,” Shikwambi ta ti. Shikwambi okwa ti omulumentu nghuka ka li a ndhindhilikwa e na uupyakadhi washa wopaundjolowele, olutu lwe olu li momake goshikondo shoku ninga omakonaakono gomuule opo ya vule okugandja onzapo yeso, aakwanezimo yanakusa oya tseyithilwa.

KoMariental mOlyomakaya opolisi oya mangulula olutu lwomukiintu moompango – taku fekelwa a imangelekele mokaiyogelo ke li megumbo lyawo molukanda Soetdoringlaagte moStampriet. Opolisi anuwa oya lopotelwa oshiningwanima shoka kuhe a hokana yina.

Shikwambi okwa ti omusamane ngoka okwa kambadhala okuteta mo omwana ashike okwa adhika a hulitha nale. “Otaku hokololwa kutya omukiintu nguka okwa li a mwena esiku lya za ko, ashike ka li ta ulike a limbililwa, ishewe ina tanguna nomuntu, ye ina thiga po omukanda gwasha tagu popi kutya oshike i ikuthile omwenyo,” Shikwambi ta ti.

Nakusa okwa tongololwa onga Frieda Kooper, olutu lwe olu li monautala koMariental, omakonakono gopolisi otaga tsikile moshiningwanima shoka.

– n d a l i k o k u l e p @ g m a i l . c o m