Simeon Martin  

Omupresidende mukulu Hifikepunye Pohamba okwa pula elelo lodoolopa yEenhana opo li tale kokapele keedila modoolopa oko ke li monghalo ihe na efiloshisho. 

Pohamba edi okwe di popya pefimbo a talela po elelodoolopa Eenhana omo a li yo a yandja omayele moipambele yayooloka inasha nexumokomesho lodoolopa.  

Moimwe yomuyo, omupresidente mukulu okwa tofa mo okapale keedila onga shimwe shomoinima notai dulu okunana omangeshefelo oo haa endele pamwe nexumokomesho oshyo eliko modoolopa. 

Ta ti okapale oko ke li modoolopa yaEenhana iha ka longifwa vali shaashi ka ke li monghalo iwa. Onghee okwa indila ovo ve na oshinakuwanifwa sho kukaleka po onghalonawa yokapale opo va adje meendabo, kalongwe, ko ka dule okuyandja omayakulo oo ka nuninwa. 

“Omolwashike elelo lodoolopa la efa okapale keedila komEenhana ka kale ke li koshi yoixwa, osho shi li sha ninga einda kaha dule okulongifwa ngee tashi ya pamatuko eedila. Eshi osha udifa nge nai unene. Ngeenge omunhu owa kufa olweendo leedila okudja ngaho keshe apa to di, mwa kwatelwa okudja kOvenduka to uya konooli yoshilongo, ou na ashike okukala wa nambela kokapale komatuko eedila kaAndimba Toivo Ya Toivo oko ke li kOndangwa. Onghee nee, ope na oshinano okweenda motuwa opo u dule okufika keumbo. Omolwashike elelo leni laefa okapale kaye koshi yoixwa?” Pohamba ta pula.  

Pauyelele wa yandjwa kumayola wodoolopa Omri-Onn Kavandje, oshikumhungu shokapale keedila osha li she likundwa kokangudu oko kali ka ulikwa kouministeli woilonga noyeendifo. Ta ti oshinakuwanifwa  shi na sha nokuteta po omiti odo, osha li sha pewa kouministeli wovanyasha nomayakulo opashiwana pefimbo olo. 

“Okapale oko tuu aka oke li mefiloshisho louministeli woilonga noyeendifo, ohatu va dimbulukifa natango, ngaashi naanaa tweshi ninga moikondo yadja ko. Omafimbo amwepo ohava nyamukula ngaho komaindilo twe a ninga. Momutumba twa ningile navo ova li va ulika omunisteli wovanyasha va unganeke nokulongekida opo oixwa i tetwe po.” Mayola ta yelifa.

Simeon Martin oku li omunambelewa yomauyelele mouniministeli womauyelele nomakwatafano opaungoba mOhangwena.