Charles Ndeumane

ONGWEDIVA – Nonande omuyalu gwaantu mboka ya gwanitha po ayihe mbyoka ya pumbiwa opo ya hogolole ogu vule omiliona 1.7, aantu ashike ye li 823 761 yi ishangitha uukalata wokuhogolola sigo oompaka. 

Omwaalu ngoka inagu adha nometata lyomwaalu ngoka gwa tengenekwa gwoomiliona 1.7 nomalimbililo otaga ningi ogendji oshoka okwa thigala owala omasiku 15 gokwiishangitha uukalata womahogololo.

Omwaalu gwaaishangithi ogwa tameke okuya pombanda okuza petameko lyomwedhi nguka Juuli, ashike natango omwaalu gwaantu ya tegelelwa yi ishangithe inagu ya nometata. Shika itashi etitha omukumo okutaalela omahogololo gopaupresidente ngoka taga tameke muNovomba.

Ombelewa yomahogololo moNamibia oya gandja omauyelele ngaka momukanda kiikundaneki ngoka gwa pitithwa komukuluntu gwomahogololo moshilongo Peter Shaama. “Ombelewa yomahogololo otayi tseyithile ngeyi nenyanyu iilyo ayihe naakwashigwana kutya nkene omaishangitho gomahogololo ga tamekele momasiku 3 Juni sigo 6 Juuli 2024, omwaalu gwaantu ye li 823,761 gwAanamibia mboka ya gwanitha po iipumbiwa yokuhogololola ogwi ishangitha meni oshowo pondje yoshilongo. Omwaalu nguka otagu ulike kutya konyala aantu ye li 24,562 oyi ishangitha kehe esiku okuza mesiku lyotango sigo gahamano Juuli 2024,” Shaama a ti.

Shaama okwa ti nonande ombelewa yomahogololo oya ndhidhilike omwaalu gwaaishingithi gu li hwepo oku za esiku lyotango sigo ga hamano gaJuuli shi vulithe oshiwike shomasiku 24 sigo 29 Juni 2024, oya ndhidhilike nomalimbililo omwaalu omushona gwaaishangithi ngoka gwa shangwa sigo oompaka meni nopondje yoshilongo.

“Ombelewa yomahogololo otayi indile Aanamibia ayehe mboka ya gwanitha po iipumbiwa yokwiishangitha omahogololo ashike inaya ishangitha natango opo ye shi ninge muule womasiku ngoka ga hupa ko. Aanamibia otaya dhimbulukithwa kutya itapu ka gandjwa ompito ya gwedhwa po yokwiishangitha, omaishangitho gomahogololo otaga tsikile sigo esiku lyotango lyaAguste 2024 nohaga kala ko okuza Omaandaha sigo Olyomakaya okuza pohetatu yongula sigo oheyali komatango.

Nonande ombelewa yomahogololo oya longitha oshimaliwa oshindji mokukwashilipaleka kutya Aanamibia mboka ye li pondje yoshilongo oya ishangitha opo ya kuthe ombinga momahogololo, aantu ashike ye li 1 348 ya ishangitha pondje yoshilongo sigo oompaka.

Omukuluntu gwomakwatathano mombelewa yomahogololo De Wet Siluka okwa lombwele oshifokundaneki shika pethimbo lyoonkundathana kutya oku na ethimbo natango. “Natango out na einekelo kutya aantu mboka ya gwanitha po iipumiwa yokuhogolola otaya tsikile nokwiishangitha, nomwaalu gwaaishangithi ngoka gwa tengenekwa gwoomiliona 1.7 otagu adhika,” osho Siluka a popi.

-mrndeumaneraycharles@gmail.com