OSHAKATI – Uuministeli wiilonga niiyenditho owa ndhindhilike iipotha yaalongithi yopate haya felefula tayi indjipala, ashike oyendji yomuyo kaye na omikandapitiko.

Uuminiseli owa pititha uuyelele mbuka esiku kwa ningwa oshigongi shi na sha niiyenditho yoondjila oonde noofupi mOngwediva. Moshigongi moka omwa li mwa gongalwa kaakalelipo ya za komahangano ge na sha niiyenditho ga yooloka nelongitho lyiihauto moshilongo ashihe.

Omupevikuluntuwiliki muuministeli woondjila Damien Mabengano okwa ti, okuhinga kwaa na omikanda oshowo epitikilo lyokufelefula, owo uupyakadhi wa dhidhilikwa moshilongo notau ende tau indjipala.

“Omilandu ndhoka dha tulwa po odho tadhi ndopeke aahingi okumona oombapila dhokufelefula, naashoka otashi eta aahingi ya yake oopate,” ta fatulula ngaaka.

Ta gwedha po ta ti, omilandu ndhoka odha pumbwa okutalululwa opo ku totwe dhimwe tadhi vulu okulongitha aantu nuupu okumona epitikilo lyokufelefula. 

Mabengano okwa popi kutya ngele omilandu ndhoka itadhi lundululwa, aantu otaya tsikile okuyaka opate, nuupyakadhi mboka itau hulu we.

Omunambelewa gumwe gwetanga lyopolisi okwa popi kutya nonando ya kambadhala okuninga iigongi yaahingi, oyendji ihaya thiki oshoka anuwa oye na uutile wokumangwa po omolwuutekete.

“Iigongi ihayi kala yi na sha nokumanga po aahingi, ihe ohatu kala twa hala okugandja omalongo oshowo okukundathana nokupwiikina omaudhigu ya taalela,”omunambelewa ta popi ngaaka.

Aahingi haya felefula, esiku ndyoka oya londodhwa ya kale haya futu uutekete wawo.

Poshigongi opo tuu mpoka, omukuluntu gwopolisi gwoshitopolwa shaShana Naftal Lungameni Sakaria okwa ti uutekisi konooli owa pumbwa okundhindhilikwa.

“Ngele uutekisi wa ndhindhilikwa otashi kwathele okushunitha iimbuluma pevi. Oshigwana otashi yugwa iinima yawo kuutekisi,” ta popi ngaaka.

Sakaria ta ti kehe gumwe okwiininga omuhingi gotekisi oshoka kape na eyooloko.

-vkaaanda@nepc.com.na