Okamatyona keedula 12 oka xulifa  eshi ka lyatwa kololi nokokabesa pefimbo kwa li taka di kofikola. 

Oshiningwanima osha ningwa oshivike sha dja ko komukunda Oniingo koshitukulwa shaShikoto efimbo lomutenya.

Nakufya okwa tongololwa oye Johannes Jerobeam, omunafikola kofikola Oshikanyandi Combined School. Komufala wopolifi moshitukulwa shaShikoto, Teopolina Kalompo-Nashikaku okwa hokolola ta ti tete okaana oka lyatwa kokabesa nokulidenga po mopate.  Okwa ti konima yefimbo okwa ka dja ololi ndele tai lyata natango omunafikola ou.

Otaku hokololwa kutya omunafikola okwa xulifila ponhele opo. Omushingi wokabesa omulumenhu weedula 32, omanga omushingi wololi omulumenhu weedula 61.

Omakonakono opolifi otaa twikile moshiponga eshi.

Opolifi oya kumaida ovadali opo va kale tava yandje ehongo kounona kombinga yokutauluka eepate.

Ovanafikola ova kumaidwa opo va kale alushe tava tale tete ngeenge otaku di otuwa manga inava tauluka opate. Opolifi oya kunghilila yoo vali ovanafikola vaha ende pomukunghulo wopate molwaashi osha nyika oshiponga.

-fhamalwa@nepc.com.na