Iigwana-hangano (UN) oya ti, aantu oyendji moNamibia oya taalela ondjala, nuupyakandhi mboka owa pumbwa ekandulepo lyomeendelelo.
Ndhoka odha popiwa kuAmushangandjayi oshowo omukwatakanithi gwonkalo yombepo mo-UN, Reena Ghelani, oshiwike shika sho a kuthile ko aatoolinkundana kombinga yomapekapeko a ningi goshikukuta moNamibia.
“Aantu taya ihilile po50% otaya nyengwa okwiihupitha, ano ya taalela ondjala, shoka unene sha etwa kelunduluko lyonkalo yombepo,” ta popi ngaaka.
Ta fatulula kutya mboka ya mono mo sha momapya gawo, itashi yelekwa netata lyaashoka ya li ye na okukala ya mona mo, omanga yamwe inaaya mona mo nando osha.
Ghelani okwa gwedha po ta ti, nonando epangelo lya kambadhala okuyambidhidha oshigwana niipalutha oshowo omeya natango inashi kwathela sha.
“Ondjala ndjoka ya taalela Aanamibia otayi limbilike nokugandja omayipulo oshowo omalimbililo kutya epangelo monakuyiwa otali ka nyengwa okugandja oshikukuta sha gwana koshigwana,” ta gwedha po ngaaka.
Ghelani okwa popi kutya etalelepo ndyoka okwe li ningi nelalakano okutala nokukwashilipaleka onkalo yAanamibia mboka ya taalela oshikukuta.
Ta popi kutya, Omupresidente gwoshilongo Nangolo Mbumba nuumvo okwa pitike epangelo lyi yambindhindhe oshigwana mokukandula po ondjala, onkene ehangano lyo-UN olye ya okutala shoka epangelo lya longo po okukandula po uupyakadhi mboka osho wo okutala mpoka taya vulu okuyambidhidha natango.
“Ehangano lyo-UN olya tula miilonga nkene lyi na okuyambidhidha opo Namibia a ze mo muupyakadhi wondjala,” ta kwashilipaleke ngaaka.
Ghenani okwa ti, okwa mono omayambidhidho gamwe nale taga gandjwa kiipangelo moshilongo.
Ta gwedha po ta ti, omahangano ga yama kIigwana-hangano ngaashi UNICEF oshowo World Food Programmes (WFP) otaga gandja nale omayakulo gamwe kaanafaalama, osho wo iipalutha kaalongwa koosikola moshilongo.
Epangelo nuumvo olya gandja oshikukuta okukandula po ondjala maantu nomiimuna sho omuloka gwomumvo gwa zi ko inaagu gwana noyendji inaya mona mo sha momapya omanga iimuna ya si enota.
-vkaapanda@nepc.com.na