TSOAXUBAMS – 25 ǂKhoesab (NAMPA) – ǀKharisimûǂam-aokha, Neville Andre Itopeb (Erongo ǀkharib) dib tsî James Uerikuab (Otjozondjupab) dib hâkha ge Hoan xa mâǂoa hâ ǀKharisiǂgaeǂgui-aosis made ge !khō!oa. 

Nēs ge khoeseǁî Afrikab ǂHarugub ǂGaeǂguis Mādi hîa Londens, United Kingdommi dis !nâ, ai!â gere ǂoa wekheb !nâ ge isa. 

Nē mādi ge Afrikab ǂGaeǂguis Î-îǂkhanib, ǂgaoǂgao!nâs ǂgiǂgosi ǀgui!nâxasib Afrikab !hūgu ǁaegus ǂhôamāǂui ǂhaweb hîa 2010ǁî kureib  ge ǂnuwiheb xa ra aiǂhomihe tsî Afrikab !nâ hoan xa ra mâǂoana hoa !hūbaisi ǀhûhâsiba ra ǁgauǂui!nâhe. 

Nē mādi ge ǁnā ǂgaeǂgui-aon hîa mâǂoara ǂharugub din, ǂhanuǁgui-aon tsî ǂnûiǂgādi dina ra ǂan!gâ, ǁîn di !gâi !âǀhurudi Afrikab ǀhûhâsi-sâuǁkhāsib omkhâis !nân ra ǀhurudi !aroma.

 “!Khō!oas nē ǀō-aisa mādi dis ge a ǁgauǁgau, mâtikō !nūse da !goaxa !khaisa, tsî !gâi sī!nâdi hîa da sada ûiǁaeb !nâ a sī!nâǁkhādi tsîna. Ti ǂansa !oas ge nēsa a ǂguro !nā, ǀkharisimûǂam-ao-i, sida !hūba xu nēti ī ǂan!gâs māsa ra !khō!oasa,” tib ge ge mî. 

Nē mādi di ǀawemā!nans ge Uerikuaba a ǁgaumâiba !aromas ge, mûmûsa ǁgauǁgaus ǁîb di ǂgaeǂguis dis !nâ ra mâǂoa, !gōsase ǁîb di ǂgaeǂguis ǀgaugu !nâ demokrasisa ǁkhawa ûiûis !nâ. 

Nēn hoan ge !gao!gaogu ǂhaitsise xūna dīs, ǁkhowa-amsa daosa hoaǁae ūhâs, !ereamxasiba oasase ūs, tsî hoana !khōǂgās digu ai !gaoǁgui hâse ra dī noxopa ra mâǂoase ge mûhe xū-i ge, ǁîb ǂōǂōsib -aegu !nâ ǀgui !aeǂnû tama hâ, xaweb mâ ǁae-i hoa-i ai ǀgau ra !âǀhuru-aon ǀkha ǁgamǁaredi !nâ ra hâ tsî hâ a ǁgoaǂuidi !aroma ǂhâbasa orede ǁaeb ai ra ôasa. 

Otjozongjupa ǀkharisimûǂamaob di ǂgae noxopa ǀgaisase ra mâǂoa xūn di ǀgui-i ge, !gâi sîsenǁareba ǂharugu-aon tsî !âǀhuru-aon ǁaegu ǀgaiǀgai tsî hoaǁae ǂgaoǂgao!nâsa. 

Nē mâǂoa hâ sîsenǁareb ge mûmûsa !nuriga ūhâ, taniǀgarahe ǁkhā omkhâisens ǂâiǀgaugu tsî ūhe ra dā!harodi !gâiba ra sī!nâsa ǁawoǁawos ase. 

-Nampa