Omutoolinghundana

OSHAKATI – Julia Amundanga weedula 33 pamwe novalumenhu vaye vavali ova pewa omhito yokulifutila mo modoolongo noshimaliwa sheeN$10 000 keshe umwe.

Ova holoka momamhungu yaShakati Omaandaxa nomakonakono opolifi otaa twikile.

Omukainhu ou vati okwa vaka oshimaliwa sheeN$300 000 mofitola yoRani Mini Market kOmungwelume ndele ta topolele ovalumenhu vaye vavali noshoyo kahewa kaye.

Ovalumenhu ovo Simon Petrus weedula 38 omukalimo womOngwdiva e na ongeshefa yongalashe naElias Shimuningeni weedula 38 a dile komukunda Ongudi.

Kahewa kaye Ndinelao Markus weedula 26 naye okwa pewa omhito okulifutila mo modolongo noshimaliwa sheeN$10 000.

Omupopiliko wopolifi moshitukulwa shaHangwena Warrant Andreas Nghiyolwa okwa hokolola ta ti omukainhu ou okwa vaka mofitola omo a li ta longele.

Otaku hokololwa kutya omukainhu ou okwa ningilwa omapulapulo nokonima okwa yandja ouyelele kutya oshimaliwa shimwe okwe shi topolela eehonda daye noshoyo kahewa kaye.
Opolifi oya hokolola tai ti omulumenhu umwe okwa hangika a holeka oshimaliwa mongalashe yaye yokupangela eetuwa i li mOngwediva, shimwe osha hangika komavalulilo ombaanga yaye.
Omulumenhu ou vati okwa hangika a futa ofikola yokaana kavo ha ka fikola kofikola yopaumwe noshoyo okufuta onduda yohiila yomukainhu waye ou a vaka oshimaliwa.

Opolifi oya hokolola tai ti omulumenhu mukwao okwa hangika a landa oipeleki neesamende daye.

Konima yoivike ivali, opolifi moshitukulwa shaShikoto oya lopota omukainhu umwe a vaka oshimaliwa monduda yomuhona waye.

Oshiwana otashi kumaida opo shi kale sha kotoka ngeenge tashi yandje oilonga.