Rudolf Gaiseb

Mubuleli walinzwi la Mulimu nacile kushwa, kasamulaho ndu yena ni mwanana wa sianga neba lobezi kuyona ya ca haisi mufuse. Elia Geingob (42) ni Oubed Skywer (15) neba shwile mwa mulilo osituhu kwa ndu ya tapelo ya lindiala mwa komponi ya Havana, mwa Windoko. Sibuabui wa sipokola Kauna Shikwambi naize, “hakusika zibwa kale kuli mulilo no tisizwe kiñi mi nokalezi mwahali. Naize bahabo bane batimezi neba lemusizwe.

Kakuya kabupaki bwa membala wa keleke ya ziba lika, Geingob, mubuleli yomuhulu ubulelwa kuli naile kwa kunwa bucwala, mi ato fita kwa ndu ya lindiala kwana pila, mi aya mwa mubuloko mwa muzuzu omuñwi. “Kakusasa lwataha kwa keleke neluna ni sebelezo. Kanako ya 11h00, nelubata kukala ni litapelo musizana yomuñwi hazwela kwande, mi ayo kuta anze ahuwa, ‘ndu ya lindiala ya ca. Lwamata kuli luto mupulusa, kono mulilo neli omutuna,” nekubulezi paki.

Johannes Gowaseb, mubulelinyana yana etelela lisebelezo Geingob hane asa lobezi, ni limembala zeñwi bamata kuli bayo timisa mulilo. Muzuzu ubihiwa kuli no kwalezwi kwande kiyomuñwi wa bashimani bane balumelelana ni Geingob, paki naize neli mukwa wakamita kutibela kuli balumeli basike balemuha bucwakolwa bwa mubuleli hanza lobezi. Gowasen naize neba konile kulwalula sikwalo, kono mulilo noso ambalakani muzuzu kaufela. Balika kusela mezi, kono mulilo wazwelapili, ni kubulaya Geingob ni mushimani.

Gowaseb naize yena ni balumeli babañwi neba sika utwa muhuwo kuzwelela mwahali. Geingob nabile mubuleli lilimo zelishumi kazesilezi, mi nakalile ndu ya lindiala kone kuse kuna ni banana ba ba kena likolo balobañwi. Mulilo nocisize litino za banana ni likubo, hamoho cwalo ni liapalo za kwasikolo ni libuka.