Auleria Wakudumo
Ovalandifi vomomapandaanda ve dule po56 va tewa tewa pomuvelo woshipangelo shaShakati ova dika eenyala medu kutya itava di po poshivelo opo, vamwe vomuvo va pindikila oule weedula di dule 30.
Ovalandifi ova tewa ponhele kexulilo laJuli kovatonateli vomaliko velelo lodoolopa yaShakati.
Ovalandifi ova lombwelwa vaye komatala Oshakati East a shiivika nawa Waapandula Noyaka eli konima yoYetu Complex, ashike ovalandifi ovati konhele oko ka kuna ovalandi va wana. Ta ti ovalandi vavo vahapu ovanaudu novanhu hava talele po moshipangelo.
Ponhele yokuya komatala oko va lombwelwa, ovalandifi ava ova tauluka ashike opate nokuya kombinga yofitola yoFurnmart oko elelo la ti natango oli na oku va taataa ko shaashi okonhele yopaumwene.
Okudja oulefimbo, elelo laShakati ola kala notali twikile okutunga omatala mahapu modoolopa opo ovalandifi va mone eenhele di na omeva, oundjuwo oshoyo oikwafifo aishe ya wana po okukwafela ovakwashiwana va landife oilandifomwa yavo. Odoolopa oya tunga omatala e li peenhele da yooloka okukwafela oshiwana modoolopa yaShakati.
Ovalandifi voposhipangeleo ohava landifa oikulya ya pya ngaashi oukuki, eeshi, omapungu naikwao. Tava ti ova li va haluka okumona eengudu mbali dovatonateli vomaliko va homata tave ya oku va taataya ponhele opo. Tava ti, omulandifi umwe womuvo okwa fangwa nokuundulwa noinima yaye oya ekelwa mopate.
“Ngeenge otwa kala inatu landifa, itatu dulu okufuta olusheno nomeva. Epangelo ola ti natu li shakeneke ondjilakati ashike paife eshi hatu kondjifa ohatu tewa peenhele opo pe na ovalandifwa vetu,” tava ti.
Ovalandifi ova ti ova shangela elelo loshipangelo shaShakati ndele tava tuminwa kombelewa yelelo yodoolopa yaShakati. “Elelo ola ti vati natu ye koutala yokulandifila.”
“Otwa shangela vali ngoloneya woshitukulwa shaShana, ombelewa yombudsman oshoyo kombelelwa yomuped minista, opo twa teelelwa enyamukulo kuvo,” tava ti.
Omunambelewa womakwatafano mombwelela yelelo laShakati, Katarina Kamari okwa ti elelo laShakati ola ti ola mona ombaapila ya dja kelelo loshipangelo shaShakati tali ngongota ovalandifi poshivelo shoshipangelo. Elelo ola ti ovalandifi ova lombwela pakanya kutya nava fiye po onhele ndele ovalandifi ova mwena ashike.
Kamari okwa ti ponhele opo ovalandifi ve li onhele yeetuwa. Ovalandifi kave na oufemba wokulandifa ponhele opo.
“Elelo lodoolopa yaShakati ola kala nokutunga omatala opo ovalandifi va twale oipindi yavo keenhele oko. Ovalandifi ova ninga vahapu nokukala monhele youtaksi. Oambulasa paife ihai piti vali noupu ngeenge ya endelela shaashi onhele aishe oya patwa ashike kovalandifi,” Kamari ta ti. Kamari okwa ti ombelewa inai lopotelwa kutya ope na omulandifi a undulwa nokwa ti otava ka popya noosekuliti.
Kamari okwa ti elelo itali dulu okuwanifa po eemhumbwe dovanhu vatano komesho yovanhu aveshe mOshakati. Ngeno okwa li ve li mondjila, ngeno xwepo.