Khorixas – Presidente Nangolo Mbumba kahundilire nompitiosili dopampo momukunda horowero Kunene asi vahepa kuruganena kumwe nepangero lyosirongo.
Morwa ngesi kuna kara moudigu worukukutu, age kahuyungire nonkango edi apa kakagwanekerere nonompitisili dopampo, mapangero gonomukunda ntani vakansela womukunda horowero.
Posiruwo sosigongi, kumwe nomukurona gepangero age kavamupere mo unene maudigu gomanene vana kumona wonkarapamwe. Age karyuganesere nye mpito zangesi mokuliyonga yomulyo pantambo zouzuni, ntani mulyo ogu gwakara monompitisili dopa mpo mekuliko ntani kuruganesa marunone monaruwa.
Mbumba katumbwire ruteni, nonzira dina pilire kuwapa, yikorama ndi yiaksama yina kureta mapiyagano movantu ntani kupira nye evhu eli vana wapukurura vatungepo mambo, mambo ntani nonzugo dokulivaterera oyo yiyo yimwe ana kumona age asi epangero yiyo vana kukondja yangoso.
Rukukutu kuna kara simwe sina gumu unene vantu navenye, omu epangero yina litamba nayinye oyo.
Pwantani ngesi, ose kuna kuruganesa yimaliwa yokusika ko N$700 yonomiliyuna omu natuvhura kuranda nondja, ntani kuditwara nye kovantu ava vana kukadipa.
Age kagwedereko asi, awo kwavatantera asi sinzi sovantu vetu ava vana kara asi kapi vana kugwana nondja edi, unene wowo vana kara asi kwatunga komavango aga navapira kukasikako noureru. Ame kuna hara asi nompitisili dopampo vahepa kudidilika vantu vangesi yipo asi vadiviseko mberewa zomukunda horowero yipo asi twahayitaerrera nampili nakauke muntu adogoroke asi morwa nzara.
‘’ Ame kwahundira nikakare nosigongi kumwe nonompitisili dopampo yipo asi nawo vagaveko asi ngapi natuza komeho nekuliko lyetu lyosirongo, udigu una gumu uhompa wawo ntani rukukutu, yimo ana kutanta ngoso.
Posigongi nye oso, vaDamara Hompa gwawo, Justus //Garoeb, katanterere Presidente asi vantu vendi kuna vagumu unene rukukutu ntani mema nago kwato govantu ndi asi goyimuna.
‘’ Ehundiro lyange, kwaPresidente, kuna kara asi nsene rukukutu narulitjindja, ame kuna hara epangero lirandere vantu yimuna vaweke, yimo ngoso ana kutanta.
Age simpe kahundilire epangero asi lyahepa kuretamo vadinguli mosirongo dogoro vakasike komukunda gwendi, unene vana kara mongesefa zounamina, yipo varetesepo yirugana kovadinkantu.
Ame kuna hara kupandura epangero mweyi varugana yokuyapaturura evango lyosure lyokulirongera unkurungu moKhorixas, ame kuna kara negano asi kupitira nye pevango olyo, vadinkantu vetu navagwanenamo udivi omu navagwedako kwayi twaweke yorunone rwetu yipo asi twahakayituma hena vahana kuyimana kuyiwapukurura, yimo ana kutanta.
Mukurona goparudi John Haneb gorudi rova Hai//om nawo kavaretere sinka sawo kwaPresidente asi nofarama sinzi edi lyaranda epangero, ngwendi Seringko, Balaika, Toevlung, Mooisplaas, Werda ntani Nuxas ngesi dina zura vantu, makura asi ewapukururo lyopangenderera vana lihepa.
Christine Klazen gorudi roSwartbooi katente asi vapunguli ava wokutunda pnze zosirongo, ava vana kuruganesa evhu lyawo mepuko, nomuvana kugusa runone rosirongo nompitisili dopampo vahana kuvapa epulisiro.
Mbumba katumbwidilire asi nayinye eyi vana gava nompitisili dopampo, age ngayi gava kwavayatumbukira yipo asi vakayizogere momunene ntani vayiture mosirugana. ‘’Ose kuna kutumbwira nompitisili dopampo asi ekuliko monomukunda dawo taliwiza.
Nkenye muhoko gwakara novampitisili vawo twahepa kugufumadeka.
Eyi kuna kara asi kuna yuka nokugazara asi ngapi navapinganeseramo Hompa, omu epangero lyahahamena mo nampili nakauke, nompitisili dopampo vaholi zetu mokureta ekuliko, morwa awo yiwo vahovere kukarapo komeho tuyakare nonompitisili paepangero,’’ yimo ana kutanta. -inashuuta@gmail.com