ONGWEDIVA – Oondoolopa monooli odha tameka dhu udha aatalelipo, mboka ya hilwa komauliko giipindi gOngwediva ngoka taga tameke ngula mEtitano sigo omasiku 31 Aguste, oshowo kesiku lyedhimbuluko lyomapendafule ndyoka lyi li ko mOmaandaha kOmuthiya.
Omupopiliko gwopolisi moshitopolwa shaShana Inspekata Thomas Aiyambo okwa kumagidha aahingi yiihauto ya hinge nuukeka yo ya gwanithe po omandhindhiliko gomoondjila.
“Ngaashi onkalondjiigilile, omauliko giipindi ngoka gokomumvo ohaga gongaleke oyendji okuza kiitopolwa ya yooloka oshowo okuza kondje yoshilongo.
Oondolopa ngaashingeyi odhu udha noondjila otadhi ka thinana nethimbo otali ka manenwa momikweyo,” ta po pi ngaaka.
Ta ti, aahingi haya hingi kashona naya kale kondjila hoka ya nuninwa, omanga mboka taya endelele ya kale kondjila yawo yomeni.
Oondolopa ngaashi Ondangwa, Oshakati oshowo Ongwediva odha tameke oku udha, nomahala gokuza pakathimbo ogu udha aatalelipo.
Mayola gwondoolopa yaNgwediva Tarah Shalyefu okwa ti omauliko giipindi otaga ka ningwa nesimaneko noompango nomalandulathano, okuza esiku lyotango sigo olyahugunina nelalakano lyokweenditha iipindi mbyoka nawa.
“Elalakano lyetu, okuulika iipindi oshowo uunongo nokugandja ompito kaanangeshefa oshowo omahangano ga yooloka ga ete omayakulo gawo popepi ,” ta fatulula ngaaka.
Ta tsikile ta ti, omawuliko giipindi gomOngwediva, ompito ombwaanawa kaanangeshefa oshowo komahangano, okuulika uunongo niilonga oshowo okushingitha iilandandithomwa yawo.
Omawuliko giipindi mOngwediva okwa li ga patuluka lwotango momumvo 2000.
“Iipindi mbika ohayi gongaleke aanangeshefa oshowo aantu ya za kokule, taya ulikilathana uunongo niilonga yawo mehala limwe,” ta popi ngaaka.
Shalyefu okwa ti, nuumvo oya tengeneka okukala ye na aawuliki yiipindi ye vule 450 okuza koombinga noombinga oshowo taya zi kondje yoshilongo.
Omawuliko giipindi otaga ka ulika iilandithomwa ayihe okuza kiikulya, kiizalomwa nakehe shoka hashi vulu okweetwa po noonyala oshowo okweeta oombelewa hadhi gandja omayakulo ga sheywa popepi.
-vkaapanda@nepc.com.na