Jazema Hangero

Ukorua Kanguatjivi ma tja omeyero wotjiwaṋa kovitjitwa vyombazu ongendo nu ozombatero zatjo maze hepwa tjinene. Kokutja ve kawondje komurungu okuhonga okuyama nokuṱakamisa ombazu ya kOuherero. 

Kanguatjivi wOelite Pioneers wa tjere nao katjisupi potjitjitwa tjombazu mOtjomuise kehi yembo ehongonekwa “Oukazendu mOvyombazu”.  Okupendukira ovitjitwa vyombazu oondjira ndji mai yama ombazu mouye womarundurukiro mbwi posi ya otjiwaṋa tji wondja oungundi tjinene.

Oelite Pioneers ikondja okuyeta omitanda popezu nombazu kokutja vi rihonge yo, otjovandu mbu mave hiti motuveze twovanene vawo tji va zu nokuwomboroka. 

“Tu vanga kutja ombazu yetu ai hi ya koka nokuṱiza onḓengu yayo omundu auhe ma kare notjari meyuru (omutongatima) noundu wawo poo koṋa ku va zu, katu vanga kutja ombazu yetu i pandjare, orondu onanḓengu i tu pangura komihoko vyarwe nu i urika ku twa zu, tjinangara kai nokutjiukisiwa nokuṱiziwa nokutunduuzwa iyeṱe oveni mai tunduuzwa i uṋe?”

Oelite Pioneers i nehika ndi tara kovitjitwa mbi mavi hongo ombazu. 

“Omundu u ya mondjuwo yetando o ha tjiwa kokutja ngo rire poo ngo kamburire vi, tjiri omuatje wOmumbanderu/Omuherero kotjiwa okurira?” 

Mokati komahongero nga karere ko pa ri omahongero wokuungura omaze wozongombe; okutona outjina, okurira mondjuwo yetando; okuṱuna otjikaiva; okutonda otjizumba pamwe nomaraisiro wovirandisiwa vyombazu (otjizumba, omahoro, ozondjupa, omitjira, otjize, nomaze wozongombe) nokuraisa ozombanda zozonde.   

“Okunyanyangiza nokutunduuza ovitjitwa vyombazu okutuurungira momirari vyomahakaeneno pekepeke omukambo omuwa kokukurisa ovirumatwa vyombazu yetu orondu otjipwikiro otjikarere nu ovandu mbe ri komahi wopendje ve yenena okurihongera ko,” 

Vikurupa Hevita omutanda omuṱakame movyombazu ma tja. 

Na weza ko kutja ovahongwa mave yenene okutjitirako ozongonḓononeno.