Omhangulilo yaMangestalata mOshakati oya anyena elifutilemo mwene womukunda Oshali West moshitukulwa shaHangwena oo ta tamanekelwa ekwatonghonga lomumumenhu womomukunda waye.
Abrosius Nghalipo okwa holoka momhangu momafiku 27 Aguste 2024 eshi vati a kwata omulumenhu weedula 33 keenghono. Oshibofa shaye osha undulilwa komafiku 7 Novemba 2024.
Otaku hokololwa momafiku 21 August 2024, pomulongo nambali woufiku lwaapo momukunda Oshali West, omufekelwa a pula nakuninga oshihakanwa oo a li poukamba vopomukunda opo vati e ke mu teelele konhele yonhumba.
Nakuningilwa omunyonena ta hokolola kutya okwa li ashike e li poundingosho hava ifanwa Omadenga opo hapa tokelwa ovanamukunda vaShali West. Nghalipo vati okwe mu ifana ndele ta ti ne ke mu teelele. Nonande ongaho, ka li eshi kutya ota ka teelela Nghalipo peni, okwe liufa kwaashi a pulwa shaashi omwene womukunda.
Nghalipo vati okwa shinga etuwa laye fiyo ta pitilile pomaumbo ndele ta i ponhele pena iivale ihapu. Okwa lombwela nakuningwa oshihakanwa a dje mo motuwa. Okwe mu lombwela kutya ota ka pula a ninge oshinima shimwe ashike ngeenge ine shi ninga onghalamwenyo yaye opo tai xulile opo efiku olo.
Nghalipo vati okwa ulika nakuningwa oshihakanwa ondjebo ndele ta kufa elapi noshiwilo motuwa nokulongela omulumenhu mukwao ouxwapindi wopaixulo. Konima eshi a mana oku mu enda konima, vati okwa pula naye e mu ende konima, ashike nakuningwa oshihakanwa okwa anya.
Vati okwe mu londeka motuwa natango ndele te mu tula popepi nounduda apa e mu kufa. Nakuningwa oshihakanwa okwa ya keumbo ta kwena nokwa pendula ovanhu aveshe meumbo.
“Okwe tu pendula ta kwena ta ti okwa hala a popye oshinima shimwe shikumwifi a ningilwa,” mumwainamati ta ti.
Mokuuda onghundana, ova dengela opolifi oufiku oo nopolifi oya ya ponhele opo pa ningilwa oshiningwanima nonande osha li oufiku, vati lwoponhatu lwaapo.
Omumwainamati wanakuningwa oshihakanwa okwa ti manga ve li poshiningwanima vati mwene womukunda okwe mu dengele ongodi. Opolifi oye mu lombwela a kufe po ongodi, naNghalipo okwe mu pula ngeenge oku na eshi a uda. Mokunyamukula kutya “eheno onda uda sha,” Nghalipo vati okwa dima ashike ongodi yaye ta ti ote mu dengele nale.
Nakuningwa oshihakanya okwa mona epango lopaunamiti nokwakonaakonwa koshipangelo nomanyamukulo okwa dimina kutya oshili okwa kwatwa keenghono.
Konima oshiningwanima sha lopotwa kopolifi, ovanamukunda ovalumenhu va fika puvatatu lwaapo navo ova popya kutya vati ova longelwa ouxwapindi wa faafana komunhu momukunda wavo omo, ashike inava lopota kopolifi shaashi vati vamwe ohava pewa oshimaliwa, vamwe ohava landelwa otombo navamwe ova udanekelwa okutulilwa mo eepomba momaumbo.
-wakudumoauleria@gmail.com