Charles Ndeumane
Ominista yehumithokomeho lyoondoolopa niitopolwa yokuushayi Erastus Uutoni okwa ti elelo lyondoolopa yOutapi otali longo nondjungu, tali gandja omayakulo kaantu yalyo li vule oondoolopa odhindji moshilongo.
Pethimbo a li ta egulula pambelewa iinyangadhalwa yomayakulo ga yooloka ngoka ga etwa po kelelo lyondoolopa yaUtapi, Uutoni okwa ti elelo ndyoka olya ulike ondjungu neitulemo miilonga ya yo yoweeta omayakulo koshigwana. Ta ti ehumokomeho ndyoka lya pondola okuza sho lya totelwe po momumvo 1997, otali ulike kutya olyo limwe lyomomalelo goondoolopa ngoka taga longo nuudhiginini moshilongo, lya gwedha Ongwediva, Oshakati, oshowo Ondangwa.
Gamwe gomoyakulo ngoka ga egululwa ongaashi olusheno, omeya ga yela, omayakulo gokupomba onyata, oopate, uundjugo, oshowo etoto lyiiyagaya ndyoka opo lya pewa omukanda lwotango nuumvo mondjokonona yelelo lyuUtapi. Omayakulo ngoka agehe oga kotha oshimaliwa shoomiliyona N$11.
“Ondi uvite nawa lela okutala nkene Outapi wa huma komeho ngeyi muule woomvula oonshona. Omo nda sikola muka, apuhe mpaka tu li opwa li pu na owala omapya, ashike paife opwa tunga, ehumokomeho owu li wete. Shika ota shi pandulilwa aakalimo yomOutapi nelelo lyeni ewanawa. Aaleli otaya longo iilonga yawo yi itula mo oshoka ita a kondjithathana,” Uutoni ta ti.
Uutoni okwa ti manga omalelo goondoolopa dhimwe taga longo nondjungu, ookansela yamwe momalelo goondoolopa dhilwe otaya kondjithathana ashike. Okwa ti omwedhi gwa zi ko okwa li a ningi oshigongiilonga moka uuministeli wehumokomeho lyoondoolopa niitopolwa yokuushayi wa dheulile ookansela yamwe uunongo wokukwatela komeho omalelo, iilonga yopambelewa niinima oyindji yi na sha nomilandu dhomalelo.
“Konima ashike yoshigongiilonga, shoka nde ya longo ondi inekela inashi tya sha kuyo. Ookansela oya shuna kiikandjohogololo yawo ndele e taya wayimine aakwashigwa e taya matuka momapandaanda taya ha holola omadhiladhilo ya uka kombelewa yelelo lyondoolopa. Kansela e na oshinakugwanithwa sha simana melelo ndele oye ta matuka momapandaanda. Paife oto hololele lye omadhiladhilo ngele ongoye kansela? Eidhidhimiko lyandje otali ningi eshona nookansela ya tya ngaaka,” osho Uutoni a popi ngaaka.
–mrndeumaneraycharles@gmail.com
Outapi niilonga… Minista gwomayambulepo goondoolopa niitopolwa yokuushayi Erastus Uutoni okwa ti elelo lyondoolopa yOutapi otali longo nondjungu. Efano: Charles Ndeumane