!Nakaǂnôa !hūb di ǁûs, Netumbo Nandi-Ndaitwha ge Afrikab !Gaeǁares (AU) ǁani !hūga ge ǂgan, î gu aoǁguigu hîa Amani Afrikab ǀgapi !harib ǂansaben !am-ǁares !nurib !nâ Afrikab ǂnamipe hâgu tsî ǂgui!nâgu !hūgu ǁaegu hâ sîsenǁareb dina xu daoǁgausa hō. 

ǁNā !nurib !khōǂgā hân ge ôa!gaodi tsî sîsenǂuigu, !nae!khaidi ǀguitikō-o!nâsib Afrikab ǁnā ǂgui!nâgu !hūgu ǁaegu hâ sîsen-ǁareb !nâ-ū gere tsūdī!nâheb, ǁnā -aeb aib ge ǂgaekhâihe tsî nēsis kōse ra sîsenūhese, !Hûǁaresa ǁAedi (UN) sîsenǀgaub !nâ-i a !khōǂgāsase. 

Nandi-Ndaitwahs ge ǂoa ge wekheb di denstaxtsēs aib Tsumeb !nâ nē !nuriba ǂhaitsise gere ǂanǂanhe soab ai nēsa gere gowaǂui. !Nakaǂnôa !hūb di ǁûs ge ǁnā gaxuse mâǂoa hâ ǁhōn hîa ǂnû-khaebahe tama is tsî ǂhâbasa !gôab !nakab Afrikaba ra ǂnû-khaebahe !khais, ǁawosa ǁanise tsî ǁaerob ǀguiba hâ ǁanisis UNs ǁAwosasib ǀAwemā!nans !nâs tsîna. Nē !nurib !nâb ge nēsiba ǂhanu-ai ǂkhîo!nâsib tsî gowaǀîhesa anuhâb ase ra mâǂoa. “!Nurib ra !gāsa kai !khais ge, ǁkhawa kō!gâs ǂgui!nâgu !hūgu sîsenǁares dis ǂgaeǂguis !aroma a ǂhâhâsa !khaisa ǁnāpas xoaǁguib ase a ǁhûihe ǁkhāse nî hâs xa, Afrikab tsî hoa !hūbaisi !hūgu !aroma,” tis ge ge mî. 

Ai!âb nē !nuriba ra mîs ge, ǂhâǂhâsasib ǁnāti ī ǂgui!nâgu !hūgu sîsenǁares dīgaugu !nâ hâ ǂkhawusasin nî gowaǀîhe tsî unuhesa in nēsi hâ ama ûib mâsiga oresa hōbas ai hâ.”Sada ge Afrikaǁ-îda ase !ereamxasiba ūhâ, khâibasen tsî da ǂhanu-aise tsî ǂhanuse ûi-ūhesa nî ǂgaoǂheresa, nē ǀoro sîsenǀgaub ǂgui!nâxa !hūgu dib nî dī-unuhe tsî ǂâuǀoasase sîsen !khaisa. Sada aitsama !hoabasen tama nî īs kara, o-i ge ǁnāsa sada !aroma nî dī khoe-e a ǀkhai,” tis ge Nandi-Ndaitwahsa ge mî. Ai!âs !nakaǂnôa !hūb di ǁûsa ge a mîs ge, nē !nurib ra ǀgonǀgon!gao tsî ama sîsenǂuiba nî !khōǂgā aoǁguigu tsîna sī!nâheǁkhā tsî ǂhanu-ai marisi tsî sâuǁkhāsib ǂnuwisaxūn ǂnamipe māsa. 

Nandi-Ndaitwahs noxopa ge mîs ge, !nurib ra !gāsase mî !khaisa ǂkhîo!nâsin tamas ka i o ǁnâusāgudi hîa ra hâdi, oro ssenǀgauba ūbē tsî ǀasa-e kurus ai hâ tamasa. 

“Afrikab mâsiba xuts nî kōs kara, ob ge ǂkhîo!nâsiba sîsenǀgauga ǁkhawa kō!gâs !aroma hâigu tsî ssenǀgauga ti ǀgui hâhâ kais ǁaegu hâ. ǀGui ǀgaub ai ǀgui nî hâhâ mâsi-i !aruǀî soa-e ūhâ tama hâ !khaisa ǂâis !nâ ūhâse da ge, !naua!noexasib !nâ ǂgui!nâxa !hūgu sîsenǁareb dīǀgauba nî dī-unu. Sada ge !goaxa -ǁaeb !nâ ǀoro ǁaeb dīǀgaugu ǀkha a ǂgâ ǁoa,” tis ge ge mî. -Nampa

ǀOro!gôab ǂnû-khaebas… !Nakaǂnôa !hūb di ǁûs, Netumbo Nandi-Ndaitwahs.