Auleria Wakudumo
Omukulukadi weedula 36 womolukanda Orutjandja mOpuwo okwa ti ye pamwe novaneumbo laye ohava xupu mokufila omaumbo avakwao molukanda lavo.
Tempo Tjindandi okwa holola kutya ngeenge oshikombo sha dipawa pokatomeno ke li popepi navo, oha kufa oshandja ndele ta lungile mumwe nomadu opo a shiive okufila omaumbo yee ta pewa oshimaliwa.
Ta ti pamufyuululwakalo ovanhu ohava lumbakanifa omapumba matalala eengobe mumwe nedu okuhota omaumbo ashike paife shaashi kape na eengobe ohava longifa oshandja shoikombo. Nonande okamaliwa ha mono mokufila omadu kakayamba, Tjindandi okwa ti otaka kwafele okweeta oikulya meumbo lavo lovaneumbo 14 ovo va tala ashike momusamane waye oo ha mono oshikukuta kepangelo.
“Ame odalele yaAngola ashike onda kala moNamibia eedula 15, nomusamane wange Omunamibia e na oufemba we lixwa po,” Tjindandi ta ti. Nonande omusamane waTjindandi e na oufemba, vati ounona vavo vahamano kave na oufemba waNamibia. Ounona ovo va hangika tava fulu edu kuKundana ihava i kofikola vati. Ina okwa ti ihava i kofikola shaashi kape na oshimaliwa shoku va landela omudjalo wofikola navali kave na oufemba woshilongo.
Eshi Kundana a pula Tjindandi kutya ounona vaye ove na eedula ngapi, okwa ti oilonga yaye vati okumona ashike ounona, xe yavo oye a pumbwa okushiiva eedula davo. Konima lela ovakwashiwana vakwao ove ya okutengeneka eedula dounona kutya ove na eedula okudja puimwe fiyo15 fiyo.
Tjindandi meenghundafana naKundana okwa holola kutya nande ounona ova mone oufemba nomidjalo dokofikola, otashi ka kala shidjuu okuya kofikola natango shaashi meumbo kamu na oikulya.
“Kofikola ngeenge otava kalya okatete, ota veya okulya shike keumbo,” Tjindandi ta pula.
Okwa ti vati oshikukuta osho hashi pewa omushamane waye kepangelo inashi wana ovaneumbo 14.
Kombinga youfemba, Tjindandi okwa ti ove lishangifa oikando ihapu omadina aye kombelewa yoikwameni nomatauulukilo okeengaba ashike inava pewa enyamukulo fiyo opaife.
Ombelewa yelelodoolopa laPuwo ola ifana Tjindandi a ka tambule oikulya kombelewa mokuuda onghalo yaye. Elelo ola holola yoo kutya ovakwashiwana vomolukanda Orutjandja ova anya okutembulwa po ponhele opo va tulwe ponhele i li xwepo ya longwa kumuni.
Tjindandi ota indile ekwafo okumonena ounona omidjalo dofikola, neemhumbwe da wedwa po.