Charles Ndeumane
OMHALAPAPA – Mwene gwomukunda Omhalapapa moshikandjohogololo shaMundaungilo moshitopolwa shaHangwena Helao Ndadi okwa ekelehi omapopyo gaanamukunda kutya oha gandja ashike iikulya yoshikukuta kookuume ke naakwanezimo lye.
Aakalimo yomomukunda Omhalapapa oya li ya lombwele Kundana taya ti ohapu piti oomwedhi odhindji inaaya pewa iikulya yoshikukuta oshoka anuwa ngele ye ya ohayi patelwa mondunda ya mwene gwomukunda yomalandithilo noha ya mono ashike tamu zi uushako wuusila tawu pewa ookuume naakwanezimo ya mwene gwomukunda.
Ashike Ndadi okwa ti omapopyo ngoka kage na nande uukwashili washa oshoka ye iha kutha ombinga miipambele yiikulya yoshikukuta.
“Ondi wete kutya ngoka omapopyo owala gaantu ya hala okulundila oshoka ngame ihandi taamba ko nenge ndi topole oshikukuta, negumbo lyandje ihali taamba iikulya yoshikukuta,” Ndati ta ti.
Okwa tsikile ta ti iikulya yoshikukuta ohayi taambwa ko nokutopolwa kuLucia Hashikuni ngoka e li mokomitiye yi na sha niikulya yoshikukuta.
Kansela gwoshikandjohogololo shaMandaungilo Festus Ikanda okwa ti ombelewa ye inayi ndhidhilika nale oshinima shooyene yomikunda taya dhana uulingilingi mokutopola iikulya yoshikukuta, ashike otashi vulika ehokololo lyaanamukunda lyi kale lyi na uukwashili.
“Otashi vulika shi kale shoshili, ashike otashi kala oshiwanawa ngele aanamukunda taye tu pe omadhina gaantu mboka taya ti oyo haya pewa iikulya yoshikukuta kumwene gwomukunda opo tu ninge omakonakono. Ishewe otashi vulika shi kale kaashi shi shoshili, ngiika aantu taya popi ngaaka molwaashoka kaye uvite ko kutya iikulya ihayi gwana aantu ayehe, ohaku pewa manga yamwe, mboka taya hupu ko taya pewa oshikando sha landula ko, yo ngiika ngele oyo ya hupu ko shi ikolelela komusholondondo gwomadhina taya zi po taya ti mboka ya pewa oya hogololwa kumwene gwomukunda,” Ikanda a ti.
Pethimbo lyoonkundathana Hashikuni okwa ti aantu oyendji mboka taya popi ngaaka oya za koAngola ya ka tungila mOmhalapapa opo ya kale taya mono iikulya yoshikukuta. Okwa gwedha ko ta ti iikulya yoshikukuta ohayi helukile pondunda yomanwino yamwene gwomukunda oshoka kapu na we mpoka tayi vulu okupungulwa.
“Iikulya ohatu yi tula mondunda yomanwino gamwene gwomukunda oshoka katu na ombelewa moka tayi vulu okutulwa. Omo nee hatu yi kutha moka tatu topolele aanamukunda mboka ye li momusholondondo gokupewa oshikukuta omwedhi ngoka oshoka iikulya ihayi kala ya gwanena aantu ayehe. Aantu mboka taya ti iikulya oha yi pewa ookuume naakwanezimo yamwene gwomukunda ota ya lundile ashike,” osho Hashikuni a popi ngaaka.