Opolisi yaNamibia oya ndhindhilike eyindjipalo lyiipotha yomateyo gomagumbo moka mwa kwatelwa omahepeko galwe haga ningilwa mboka haya adhika momagumbo kaafuthi.
Aafuthi anuwa otaya longitha ompito kehe ethimbo ndika lyoomwendhi dhahugunina dhomumvo, onkene oshigwana oshi na okukala uupathi ethimbo alihe okugamena omaliko gawo.
Opolisi oya ti, aafuthi otaya ponokele omagumbo gaantu unene ethimbo lyomutenya omanga ooyene ye li kiilonga, omanga yamwe taya yi momagumbo omanga ooyene ye li mo.
Sha ikolelela kepeko lyopolisi yiiningwanima yomehuliloshiwike, omukiintu gumwe moshitopolwa shaKhomas okwa li ta longo sha kokompiyuta yopeke uusiku, aafuthi anuwa oya li yuumbu kombanda yiipeleki, nopethimbo a katala shoka shi inyenge, aafuthi oya hili po okompiyuta yopeke nongodhi okupitila mekende.
Aalumentu yaali oya mangwa po koolisi mondoolopa Outapi sho anuwa ya teya ehala tali ithanwa Love Station, e taya teya ishewe eshina lyokudhana taya kutha mo iimaliwa, ihe inayi monika natango.
Natango opolisi yOutapi oyi li molukongo lwaamboka ya teya egumbo limwe komukunda Ohama moka ya kutha mo iinima yongushu N$8 700.
Iinima yongushu yoN$35 000 anuwa oya yakwa megumbo limwe momukunda Oshipumbu momundhingoloko gOutapi, lwopotundi 20h00. Opolisi okupitila mepeko lyopolisi oya ti oya manga po omulumentu gwomimvo 39 sho anuwa a yaka po iikombo nonzi, ayihe yongushu N$15 000, kofaalama tayi ithanwa Brukaros.
Otaku kongwa wo ngoka a yaka egumbo limwe molukanda Tulipamwe kEenhana, Etitano. Iinima anuwa yongushu N$12 300 oya yiwa nayo.
Opolisi oyi li ishiwe molukongo lwaamboka ya teya ehala tali ithanwa Trans Namib Material Camp moka ya kutha mo iinima yongushu N$68 600.
Oshingwanima shoka osha holoka koKarasburg ethimbo kaa li shiwike.
Okwa lopotwa ehala tali ithanwa JBE Agri Implements cc mOtjiwarongo lya teywa nomwa kuthwa iinima yongushu yoN$154 350. Opolisi otayi kumagidha oshigwana shi kale aluhe mekwatathano nopolisi uuna iiningwanima mbyoka tayi holoka, oshowo momagumbo mu kale aantu ethimbo lyomutenya.
Tayi indile ishewe oshigwana shi ikaleke kokule okulanda iinima tayi landithwa momapandaanda.
Ngoka anuwa a landa iinima yaa na oombaapila, naye ota yi konima yekumba.
-vkaapanda@nepc.com.na
Caption: Omateyo gomagumbo… Omateyo gomagumbo ga indjipala moshilongo.
Efano: Otali ulike ashike