Charles Ndeumane
Molwoshipewa nohokwe yokunongeka aanona, omulongisikola e li mopenzela okwa patulula okakinda kaanona momukunda Onalunike B moshikandjohogololo shaMuthiya moshitopolwa shaShikoto, ashike okwa pumbwa omayambidhidho opo a yambule po okakinda hoka.
Omukalimo gwomomukunda Onalunike mOmuthiya Maria Kauna Ndengu ngoka e li moomvula dhopenzela okwa ti peha lyokukala megumbo kee na sho ta longo okwa patulula okakinda opo a tsikile noshipewa she shokunongeka aanona. Momukalo ngoka ota kwathele uunona wu ilonge pamwe nayakwawo osho wo aavali ya kale ya manguluka okuya kiilonga.
Ndengu okwa ti okwa ndhidhilike kutya uunona ohawu tseya oshindji mbala ngele tawu ilongo pamwe naanona ooyakwawo.
“Ohandi longo nuunona womimvo dha yooloka, wumwe owe ya po kaawu shi nokupopya ashike paife otawu ende tawu tseya nawa oshoka otawu ilongele kuyakwawo”.
Ndengu okwa ti nonande eilongo otali ende nawa, okakinda oka pumbwa omayambidhidho opo omudhingonoko gu opalele uunona ngaashi iidhanitho nuukwilika wuunona wokudhana.
“Uunona otawu ilongo nawa oshoka owu li momudhingoloko omwaanawa, nomwaalu otagu ende tagu koko ashike otwa taalela omashongo unene konkalo yombepo oshoka otu li owala kohi yomuti. Ngele okwa zi ombepo otayi vulu okweetela uunona eshikisha, onkene otatu indile tu yambidhidhwe nande onetala nenge iipeleki,” Ndengu ta ti.
Shi ikolelela kuNdengu okakinda hoka itaka kwathele owala uunona mboka hawu longwa po ngashingeyi ashike oke na oshilonga sha simana momudhingoloko moka, otaka patulula ontseyo yaanona ya ka ninge aantu aayinekelwa moshigwana, onkene aaiyambi mboka taya ka kwathela okakinda hoka otaya ka kwathela oshigwana oshindji.