OMUGULUGWOMBASHE – Nonande epangelo tali twikile okuandjaneka oikulya yoshikukuta, ovakwashiwana vamwe onghee natango tava dengwa kondjala koitukulwa imwepo. Immanuel Ashimbanga weedula 42 okwa hokolola ta ti okwa ninga omafiku atatu ina lya molwaashi oufila waye woshikukuta owa pwa po.

Omulumenhu ou e li omukalimo womomukunda Omugulugwombashe moshikandjahoololo shaTsandi, moshitukulwa shaMusati okwe lixula okupewa oshikukutu konima yeemwedi mbali. 

“Paife ohandi piti ashike ongula nda uka keendingosho molwaashi meumbo kamu na oikulya. Ohandi xupu ashike motombo ngeenge nda fiilwa mo kuvakwetu,” ta hokolola.

Ashimbanga okwa ti oha nangala monduda yokatwali ya dikwa noiti naashi oshi li eshongo linene pefimbo lodula.

Okwa weda po ta ti pefimbo lodula oha nangala keendingosho molwaashi onduda yaye ohai lokwa.

“Ohandi dengwa koluhepo. Onda pumbwa ekwafo londuda yoshipeleki,” ta ti.

Okwa ti onduda yaye paife oi li popepi nokuwa po shaashi eengudi oda lika keehedi.

Omulumenhu ou okwa hokolola ta ti oku na oulema keisho laye lokululyo ihali mono ko konima eshi a li a tuwa noshiti. “Onda kondjifa okushangwa opendjela ashike inandi shi pondola,” ta ti. Okwa pula epangelo opo li mu pitike e lishangife oshimaliwa shopendjela molwaashi ota dengwa koluhepo. Pefimbo Kundana a talela po eumbo laye Etivali okwa hanga Ashimbanga ta di keendingosho e kwete okandini kotombo.

Ashimbanga okwa ninga paife eedula nhano ina lima molwashi vati kape na ou ta pulula epya laye.

Ovakwashiwana vomukunda Omugulugwombashe ova hokolola tava ti oikulya yoshikukuta ohai kala ko unene efimbo lile.

Selma Ashimbanga okwa hokolola ta ti omaumbo amwe oku na ovanhu vahapu tava xupu moikulya yoshikututa ashike oukutu voufila ovashona. Eshi a kwatafana naKundana kansela woshikandjohoololo shaTsandi Junias Amunyeke okwa koleka ta ti ombelewa oye lipyakidila okutopolela oshiwana oikulya. “Ombelewa yomupilimaminista nayo oye lipyakidila yo okutuma natango oukutu voufila koitukulwa ya yooloka,” a weda po.

-fhamalwa@nepc.com.na