KATIMA MULILO – Lizazi la nyakalalo Lamubulo musihali hala banana babane neli felile kamaswabi kasamulaho bupilo bwa bona bwa yunda bamano kwalelwa mwa fuliji yakale kwa komponi ya Cowboy mwa Katima Mulilo. Banana nebazwa kwa mandu ashelashelana mi neba bapala hamoho kwandu fuliji yakale yene sabeleki neli fande. 

Kukulubelwa kuli banana nebakeni mwa fuliji banze babapala. Kabumai, fuliji yaikwala bakeñisa kuli nena ni mutandalo wakukiya ni sikulukulu. Kalibaka leo banana bakwalelwa mwahali mi neba sakoni kuzwa mwateni. Neba fumanwi feela kiyomuñwi kasamulaho akubatonda. Zeo neli ezahezi mwahala nako ya 13h00 ni 14h00. 

Kasamulaho alipatisiso yana bafumani nalatelezi mutala wamautu one umuisize kwa fuliji teñi makatulo ababañwi banana nali fande. Akwalula fuliji mi afuma banana basa buyeli. Bane batimezi ki Precious Simataa, walilimo zetalu, Chombo Matengu walilimo zetalu, Variety Lubilo walilimo liketalizoho, ni Mwaka Muzimisa walilimo zene.

Ndatahe yomuñwi wabanana, Aranges Shoro (21) naize, nali kwamusebezi kezo haiezahala. “Hanikuta kwandu kwalico zamusihali, nato fumana batu babañata bapotolohile ndu. Nasutelela kuli ni bone ze ezahala. Nafumana banana bababeli balobezi mwatasa kota. Bababeli nebaswelwi kutusiwa kibabeleki bamakete, bababeli nese bashwile,” nekubulezi mushemi wamuuna.

Kasamulaho anakonyana mapokola banitifaza kuli banana bababeli bane bapilile nikumatisezwa kwasipatela nibona nebailo timela. 

Mulauli wasipokola mwasikiliti sa Zambezi Andreas Shilelo nanitifalize taba yeo.  “Kimamela yetuna kwa bashemi kuli lutokomele silalanda sa ndu kubona kana kuna ni libyana zekona kutisa kozi kwabana baluna. Kuyemela sipokola lufitisa manzwi aluna amatomolapilu kwa mabasi abanana bao babatimezi,” nabulezi.