Hilma Nakanduuungile
Okongo- ministeli zoparudi vharwa kupitira mwaMinistera gwazo Doreen Sioka kahundilire ava ava vakwatesako valihamesere mo unene vatare asi ngapi navagusapo udigu ou wokugwana mazimo nounona nona, kukwama omu sina kulikida sivaro.
Age katente nonkango dangesi poopo kavadene ezuva lyomunona gwaAfrika, kalikarere ko Nghifikwa Ndailikana posure zoprimere momukunda horowero gosintokorwa Okongo moOhangwena. Apa kahuyungisire epongo, Sioka katente asi mukunda horowero gwaOhangwena gwelike, kuna kara novanonagona vagwana mazimo kupitakana sivaro sovantu 9 000 ava vana kara asi kohi zonomvhura 19 eyi vagavako kutunda tupu mo kwedi kwa Murongaagona 2020 dogoro Kudumogona mvhura ezi.
Age katente asi mukaro nye gwangesi guna pumbwa kugutara momunene ntani pana pumbwa ewapukururo. ‘’Eyi kuna kara asi nokuyitamburasi nampili nakakuke, omu tuna kumona nye asi sinzi sonanona kadona kuna kugwana mazimo nounona nona.
Eyi kuna kara nye mulyo kwetu ose vakurona, nkarapamwe novanalirongi tulipakerere ni kumwe mokurwanesa mutondi ogu ana kara mokatji kovanona kadona vetu, yimo ana kutanta Sioka.
Age simpe kahundilire vahamenimo navenye asi vahepa kulituramo unene mokutura mukaro gwangesi pelikwamo lyawo nokutantera vantu rambangako vena vanona asi udona musika wakaramo mokugwana ezimo nounona nona, ntani udigu ou wokuvatera nye owo vana kara asi awo woruhepo.
‘’Eyi yahepa kupitara mwene tuna lipakerere, kuna kuruganena kumwe omu nkenye munona nadiva mulyo gwendi gokomeho omu nage ngakakambekako kekuliko lyosirongo, yimo ngoso ana kuyifaturura. Posiruwo sooso ministera goana gerongo Faustina Namutenya Calley katente asi erongo moNamibia kuna lituramo unene asi kwato ogu navasigako gahana kulironga ndi asi kuza kosure omu vana kukondja asi vagusepo nkenye elimbiko lyonkandi nokugava nkenye mbatero komunona gona aze kosure. ‘’ Ministeli zerongo zatulisapo noveta nomalikwamo omu vagatura asi malikwamo age gavatere vanona woruhepo, nkenye munona vahana kutara asi rudi vharwa rwendi yinke, ndi asi gourema ndi asi ekonomi lyendi kapi lyawa gahepa kumutura merongo ntani. Yipo nye asi nsene koveli vanona vana kupira kugwana erongo, twahepa kuyirugana eyi kupitira monompitisili detu domonkarapamwe asi nkenye munona gahepa kuza monkondwa rongero, yimo ana kuhundira ngoso Caley.
Mokugwedako, mbunga zouzuni zakarerapo vanona zakara nosimaliwa asi agendesa Samuel Ocran kahundilire asi navenye vahepa kulihameseramo omu navatara asi vatjindje mukaro gomparukiso nokukeverera maparu asi vanona gona kadona nawo vakasikisemo eparu lyawo monaruwa.
‘’Kumoneka udona nsene asi ose, vakurona ava vana kugava mbatero kovanona, nyose hena posiruwo simwe tuna kuvaruganesa mepuko. Eyi yimwe yina kara asi yahepa kuhaga. Nkenye munona ana pumbwa kumupopera keninkiliromo.
Yipo nye asi sina kara sinka setu natuvenye asi sikare situmbukira setu asi vonona kadona ava tuvatakamese. Yimo ngoso ana kutanta nomukumo Ocran.