Auleria Wakudumo

Opolifi moshitukulwa shaMaheke otai konakona oshibofa shetomeko lomundilo konima eshi omufekelwa ehe shivike a tomeka nelalakano okuxwika po mangestrata waGobabis.

Omupopiliko wopolifi Chief Inspector Elifas Kuwinga okwa ti oshiningwanima osha ningwa Etivali lwopokati kotundi 01h00 nopo02h00, sha ningilwa moGobabis.

Kuwinga okwa ti vati omupolifi womukulukadi ha di meumbo lopolifi okwa fekela kutya mangestrata ota pi, eshi a mona omwifi tau di meni letungo lamengestrata oyo i li ashike eemeta100 kokule nomaumbo opolifi.

“Okwa lombwela ovanailonga pamwe naye meendelelo. Kadimamundilo naye okwa fika meendelelo okudima ondalu,” Kuwinga ta ti.

Vati omufekelwa okwa pitila momukala wohmhangu ndele ta tatula ekende lombelewa yomupanguli nekatana e li hanga pondje omo vati a tomeka omundilo.

Ombelewa vati oya toma omundilo ndele omundilo tau lihanene keembelewa dikwao.

Oinima imwe oya pya po filufilu omanga ikwao ya dula okuxupifwa.

Nonande taku fekelwa kutya omundilo owa tomekwa komunhu, kape na ou a kwatwa po fiyo opapa nomakonakono opolifi oku li metifa.

-wakudumoauleria@gmail.com