OUTAPI – Oyendji yomaakiintu yeli momategelelo mboka ya yuga oontanda popepi noshipangelo shaUtapi, otaya hupu shokadhila, noya tala momandoloma giiyagaya gomondoolopa moka hamu ya zilili oshikwiila shawo shesiku kehe.
Ehala ndyoka lya gongalwa kaakiintu yathika po 20 olyi li ashike oometa tadhi tengenekwa 400 okuza mOutapi.
Omutoolinkundana nguka sho kwali a thiki pehala mpoka mehuulilo shiwike, okwa adha omeme yeli momategelelo ya gondja kohi yomano, omanga yamwe taya longekidha omwiha.
Selma Shikulo a za koRuacana okwa ti, oha penduka ongula taka konga iikulya mondoolopa dhiiyagaya mondoolopa omanga iiyagaya inaayi kuthwa mo momandoloma, ta hogolola iikulya mbyoka iihwepo opo a vule okumakela sha.
“Otandi ningi ngiini ngele kandi na iiyemo ya sha, ondina okukonga mpoka tandi mono iikulya opo ndi thike komasiku gandje gokukamona ohanona yandje,’’ ta popi ngaaka.
Maria Silas a yambukile komukunda Onawa okwa ti, okwa kala pehala mpoka oomwedhi mbali opo a kale po pepi noshipangelo.
“Ngame omumvu, ondi na omifudho itaadhi adhathana nawa, sho shoka nda kalela oshipangelo oshoka itandi vulu okukala tandi zi kegumbo kOnawa, kandi na oshimaliwa sholefa sho kuya nokuza koshipangelo kehe konima yoshiwike,” ta hokolola ngaaka.
Silas Esiku ndyoka okwali aadhika ta teleke omatama noonyanga, anuwa ota ningi osopa a lye.
Ta ti, otali ashike ngaaka ta tapula, oshoka kena sho tali nasho.
“Onkalomwenyo oyetu dhigupalela, otuli ashike mpaka twafa iiyamakuti, tuli mokati kombepo nomutenya, oondje nomayoka ogeli mokati ketu,” ta ti ngaaka.
Christine Mwatilevi, omukwashigwana gwaAngola, ngoka naye iihumbata, okwa ti, okwa kala pehala mpoka oomwedhi dhaadha kuntano, ta hupu shokadhila.
“Onda teta ooshako dhoosamende odho nda ninga ombete yandje oshoka pevi opwa kukuta. Otandi galikana ndi mone ohanona yandje yina uukolele, opo ndi vule okushuna kegumbo kuyele,’’ ta po pi ngaaka.
Theresia Tobias (27) gokomukunda Otjitazu okwa popi kutya okwa tegelela ashike omasiku gokumona ga thike.
“Ehala ndyoka lyili moshipangelo olyuudha kalina omahala sho oshoka shetu thiminike okukonga olukalwa mpaka” ta ti ngaaka.
Thobias okwali pamwe noomeme yeli momatagelelo mboka kwali taya tungu iimbale niililo yaka landithe yo ya mone oshimaliwa shoku landa omboloto.
Omukukuluntu guuhaku nonkalo nawa moshitopolwa shaMusati Alfons Amoomo, okwa ti ehala hali kala omeme yeli momategelelo moshipangelo shOutapi inali udha nando.
“Aantu oyendji yeli pehala mpoka oya za koshishiindalongo koAngola. Otuna omilandu dhili po opo gumwe a pewe ehala moshipangelo,” ta fatulula ngaaka.
Ta ti, ehokololo ndyoka taya po pi kutya oshipangelo oshuudha kali shi lyo shili. Ta fatulula kutya omalukalwa goomeme yeli momategelelo ihaga gandjwa kuuministeli wuuhaku, ihe okelelo lyondoolopa.
“Omeme mboka oyali ya tidhwa po nale mpoka, ihe natango oya galukila po ishewe,” ta ti ngaaka.
Nena otuna oshigongi shili ko tashika popya kombinga yomeme yeli momaegelelo , oshiwanawa ngele to thiki wu mone uuyelele awihe oshoka otaku ka kala aakaleli po ayehe taya vulu okuyamukula omapulo kombinga yomeme yeli momategelelo nomalukalwa oshowo omashongo ya taalela.
Minista guuhaku Kalumbi Shangula okwa ti, ina tseya kutya opena omeme yeli momategelelo haya zi kohi yomano kOutapi.
Ta fatulula kutya omulandu oguli po kutya, uuna omuntu ta alukwa ohakwatelwa moombete, ihe ngoka eli nawa okuna okuza kegumbo.
Olundji omeme yeli momategelelo, haya zi ko kule niipangeli moshilongo ohaya kala yeli muupyakandhi womalukalwa oshoka iipangelo yimwe kayina omahala ga gwana okugandja omalukalwa koomeme ayehe, shoka hashi ya thiminike okulala kehe mpoka.
Oshifokundaneki shaNew Era Ohela osha nyanyangidha ehokololo kombinga
yomanyenyeto gaakalimo yokoshitopolwa shaKunene yaloloka okumonena ohaanona moondundu, momagumbo oshowo miihwa.
Oya indile opo ya mone omauwanawa haga pewa omeme yeli momategelelo oshowo mboka taya mono oohanona.
Omanyenyeto
Shilunga Nangombe gwomukunda Omushii kOutapi okwa nyenyeta kutya iimuna yawo oyili muudhigu wo kulya oonayilona niinima oyindji, hayi gongelwa koomeme yelu momategelelo ya gongala pehala mpaka.
“Otwa kala noku lopota kutya aantu mboka otaya gagaleke ehala, oshoka ohayaka toola iiyagaya komatoto, mbyoka haya etha tayi yi nombepo tayi liwa nokutula iimuna yetu moshiponga,’’ ta nyenyeta ngaaka.
Simson Shigwedha gwomomukunda Ohambalanganga naye ota nyenyeta kutya omeme mboka yeli momategelelo otaya kakeke oshana, moka omo hamu luthilwa iimuna yomomikunda dho po pepi.
“Elelo lyondoolopa olya pumbwa okuninga po sha iimuna yetu oyili moshiponga, se katuna iimaliwa yokulanda omiti dhiimuna,’’ ta po pi ngaaka. –vkaapanda@nepc.com.na