Auleria Wakudumo
Ovanailonga vetanga lomombada leameno koshikondo shoitukidila vati ove lihanga monghalo yopashimaliwa ya naipala, eshi vati koshimaliwa shavo kwa kufwa pehe na etomenho.
Ava vati okwa li hava pewa shimaliwa sha wedwa po molwoilonga yavo oyo ya nyika oshiponga, ashike oshimaliwa eshi osha kufwa ko okudja muApiilili fiyo onena
Oshimaliwa eshi vati oshi li pokati koN$1 090 noN$4 500.
Eshi tashi kumwifa osheshi vamwe vomuvo tava twikile okumona oshimaliwa osho, nonande vamwe ove shi kufwa. Vati eshi va pula ovakwatelikomesho vavo, ova lombwelwa kutya ava va mona ovanelao.
Ovanailonga otava ti ova kanifa shihapu. Tava ti ove na omaumbo haa nanwa, eetuwa, eemhumbwe domomaumbo nosho tuu.
Umwe womovanailonga oo a pula Kundana aha popye edina laye okwa ti oku na ounona hava i koiputudilo yopombada nosha ninga shidjuu paife ngaashi va taalela ekonakono laxuuninwa.
“Onda uda nai shaashi okila yokutalaleka yange nombete oya ilwa ko shaashi ihandi wanifa vali okufuta. Paife eemwedi hamano inatu pewa nande enyamukulo lasha,” umwe ta ti. “Oshiima sha li po, osha li po ashike. Ngeenge opwa kufwa nande N$10, nena eemhangela doye oda nyonwa,” mukwao ta weda ko. Ovanailonga ova weda po tava ti ova li kupula omanyamulo ashike fiyo opapa inava pewa etomheno kutya omolwashike.
“Otwa pula okudja keekommanda detu, ashike ode tu lombwela kutya oda pewa elombwelo koministeli yemona li na sha nekufeko leendjabi, ashike ouministeli wemona owe tu undulila kombelewa yomupilima,” umwe ta hokolola.
Meenghundafana naKundana, omupopiliko wouministeli weameno, Lieutenant Colonel Petrus Shilumbu okwa dimina kutya ovanhu vamwe ova kufwa shili eendjabi davo da wedwa po. “Ovanhu inava hoololwa, osha ningwa ashike momumbalangadjo kouministeli wemona. Ouministeli weameno opo tau mono omukanda okudja kouministeli wemona kutya omolwashike oshimaliwa osho sha kanghekwa, Shilumbu ta ti. Shilumbu okwa ti ombelewa opo tai kwatafana nombelewa yomuprima nombelewa yemona moshinima osho. Ta ti oshinima osho oshinima shomeni louministeli weameno, notashi kandulwa po meni louminsteli weameno.
“Kape na osho ouministeli tau dulu okuninga. Itashi ti ngee va lopota koikundaneki opo tava ka pewa oimaliwa oimaliwa yavo,” Shilumbu ta ti.