Omukuluntu gwopolisi moshitopolwa shaShikoto Teopolina Kalompo-Nashikaku okwa kumagidha oshigwana shi kale tashi thigi aanona momatonatelo gaantu aayinekelwa.
Kalompo-Nashikaku okwa kumagidha ngaaka konima a ndhindhilike omakwatokoonkondo taga indjipala moshitopolwa.
Ta gwedha po kutya onkalo ndjoka oya nyayikila, uuna gumwe a kwatwa koonkondo onkalo yomuntu ohayi lunduluka, ihayi kala we ya faathana.
“Oshilalo shoka uuna sha holoka momuntu ihashi polo.
Omakwato koonkondo oga pimbila noonkondo, kehe esiku oopolisi otayi lopota omakwato koonkondo taga ningilwa aantu okuza kaanona sigo aakaluntu,” ta nyenyeta ngaaka.
Okwa lopotwa uunona wu li uuyali womimvo 10 oshowo 14 wa kala nokukwatwa koonkondo komulumentu gwomimvo 20. Oshiningwanima shoka osha holoka momukunda Uuholamo.
Kalompo-Nashikaku okwa hokolola kutya omulumentu ngoka okwa kala nokwiiyakela megumbo lyopuushiinda uusiku uuna aanona mboka ya kotha.
“Omulumentu ngoka okwa kala nokumbandameka aanona mboka yaali, okwa kala wo te ya uvanekele oshimaliwa,” ta ti ngaaka. Omulumentu ngoka okwa mangwa po.
Natango omulumentu gwomimvo 30 okwa mangwa po sho anuwa a kwata omukiintu gwomimvo 17, ngoka e na uulema wopamadhiladhilo koonkondo.
Oshiningwanima shoka osha holoka momukunda Elavi, Omaandaha lwopotundi 20h00.
“Oukiintu ngoka ha kala megumbo nanakuningilwa omuyonena anuwa okwa li fala nakuningilwa omuyonena mondunda ye moka ha lala, omanga a li a ka pungula. Sho a mana anuwa okwa li a shuna mondunda a ka kwashilipaleke ngele okwa lala nawa noku mu siikila,” ta hokola ngaaka.
Sho anuwa a yi mondunda moka, ta minikile notoshe okwa adha omulumentu e li kombete nomukiintu ngoka inaaya zala sha ayehe.