OSHAKATI- Oimbuluma molukanda Oshoopala, olo kwa li hali ifanwa Hanghambya otai ka kandekwa noupu molwaashi paife ovakalimo vokolukanda oko ova pewa oshitaashi shopolifi.
Oshitaashi shopolifi otashi ka yandja omayakulo a yooloka ngaashi okupatulula oibofa nokuninga oikonga molukanda yokukelela oimbuluma.
Okwa didilikwa olukanda Hanghambya olo limwe hali tyakaleke noimbuluma i li pombada ngaashi oumbudi wokuteya omaumbo, ovanhu tava nyekwa omaliko avo, okulidenga novanhu tava dipawa.
Neudo omo, omwa lopotwa omulumenhu omukwashiwana waAngola a dipawa ndele ta nyekwa oinima yaye oyo kwa li ta landifa.
Olukanda eli olo limwe hali tilika koshiwana molwaashi oku na ookalyamupombo va nyika oshiponga. Ovaendi vokolupadi vahapu, hava di kombinga yokEhenye nOnawa ohava tila okutavakana mOshoopala.
Pefimbo ta patulula oshitaashi shopolifi pambelewa, mayola wodoolopa yaShakati Leonard Hango okwa ti ovakalimo vomuHanghambya nava longife omhito ei oku ka konga omayakulo koshitaashi.
“Ovanhu tava longo oimbuluma nava lopotwe nokukala va kwatwa po diva molwaashi ookalyamupombo inava pumbiwa mokati kovanhu,” ta ti.
Okwa pandula ombelewa yakomufala wopolifi moshitukulwa shaShana eshi ya tula po oshitaashi shopolifi kolukanda e li molwaashi otashi kwafele okushunifa oimbuluma pedu.
Hango okwa ti elelo lodoolopa yaShakati otali twikile okuyandjaneka omayakulo koshiwana nosho yo okulongela kumwe nopolifi.
Okwa kumaida oshiwana opo shi longele kumwe momidingonoko davo okulwifa oimbuluma.
Komufala wopolifi moshitukulwa shaShana Commissioner Naftal Sakaria okwa kumaida ovapolifi tava longele poshitaashi shipe shopolifi opo va longe nondjungu nokuyakula nawa oshiwana.
“Inandi hala okulopotelwa kombinga yovapolifi itava yakula nawa oshiwana,” ta ti.
Sakaria okwa weda po ta ti oshitaashi osha nuninwa okuyandja omayakulo koshiwana.
Okwa ti molukanda Hanghambya ohamu kwatwa ovanhu ve na oilwifo ngaashi eendjebo dihe na eembapila nomakatana nosho yo ovanhu tava twaalele eembele keendingosho.
Efiku olo lepatululo loshitaashi Sakaria okwa ulika ondumba yeembele nosho yo omakatana a hangika novanhu vomuHanghambya.
Okwa ti molukanda tuu omo omu na ovanhu vahapu vehe na omikanda domaufemba.
Sakaria okwa ti odoolopa yaShakati oyo imwe yakula, naashi otashi ulike kutya odoolopa oya pumbwa oitaashi yopolifi ihapu.
“Oshiwana okwa li hashi longifa oshitaashi shopolifi kOshakati ashike paife osha pewa oshitaashi shi li popepi,” ta ti.
Lusia Shilongo omukalimo womolukanda Hanghambya okwa ti paife itava ka mona vali oixuna yokuya koshitaashi shopolifi kOshakati oufiku.
“Paife ohatu dulu okukala hatu lopotele opolifi efimbo keshe molwaashi otwa pewa oshitaashi,” ta ti.