1 !Khanni 2025 disa xus ge !hū!nāsise a mîǁguisa ǁ-îs a ǀoro !gôab di hōǂgāmarisa(NWM) hoa Namibibiaǁîn, ǁgâusîsenaon tsî !garo!ā sîsenaon ǀguina ǂoa tsi, N$18 ai ǀgui ira mātarehe. Nēs ra ǂâibasens ge, ǁnā sîsenaon hîa N$18 xa a ǀorose ǀgui iri !aroma ra mātarehen di maris nî ǁnās !oagu unuhesa. Nau ǀkhāb ais ge ǁgâusîsenaon tsî !garo!ā sîsenaon di !khō!oamarisa !nona kurigu ǁaeb !nâ nî ǀgapiǀgapihe, N$18 ǀgui iri di ǂgaoǀkhāsa 1 !Khanni 2027 dis ai sī!nâs !aroma. ǁÎb a ǀoro  !gôab !khō!oamaris dib ge Namibiab !Hūǂhanub di ǂHanumās 95 di (e) !âb !nâ !khōǂgāsa tsî ǂHanuba xu ra ǂgaoǀkhā ǁguisa ǁgaragu hîa !khō!oamaridi ǂnamipe hâga kō!gâsa: 

“ǁAwosasiba mās sîsenaon tsēkorobe ûib ǀkha ra !gûǁare ǀgaub !nâ ra mātarehesa tsî !gâiba hâǁareb tsî !hao!nāsi-aib ai hâ !ēdi !nâ ra ǀama !khaisa”. “Hōǂgāmaridi ge ǁnās ase !gôaǂuihe tsî nî mātarehe tamas ka i o elektronise a mātare!kharuhe ǁkhā, xawes ge nē marisa tā xawahe ra ǂûn tamas ka i o hâ ra ǀkhara ǀkhaeb tsî xūn !aroma ǀoroǀorohe tide. NWMs ǀkhāba xu nî nē !nona kurigu di ǁaeb !nâ hâ marisi ǀgapiǀgapis ge ǁgâusîsenaon tsî !garo!ā sîsenaon tsîna nî !khōǂgā. NWMs di hâs ge ǀō-aisa !âsa sada !hūb ǁaes di !gûǂgarob !nâ ǀhûhâsib ǀguitikōsib tsî sâuǁkhāsib ǂhanu-aisib !nâ ra ǀhuru. 

Kaise gaxu ǁaeban ge !gôahe ǁoasa !gôab di Namibiaǁîna tsau tsî ǀûsen tamase sîsen, ǀnî ǁaega ī tama mâsigu !naka tsî xawe ǀams ai ǀgaisa hōǂgā-i tsîna hō tama hâ. Nē khoen tsîn ge sada sâuǁkhāsiba ra hui!nâ, sada ǀhûhâsiga ra omkhâihui tsî sada ǀhûhâi ǀkhāba !oa ra unutsâ … , nē hoanan !gom mâ hâse ra dīse. Nēb ge sâuǁkhāsib mâsis guise hî tamaba, xaweb ge khoesis, !gôasib tsî ǂhanu-aisib di ǁhō,” tib ge ministeris sîsengu !gae-ǁaredi tsî sîsengu ǂnuwis dib, Erastus Utoniba ge mî. Utonib ge Kabinets komites ge -ǁîs ôa!nâs !nuriba gere mā soab ai ge mî,  NWS di sîsenxas, ǁause ge a dīhe ǀkharaǀkharas ǀguisa hî tama hâ, xawe ǁguiǂgāsens Namibiaba ǁaes ase mâba !gâi ǂūsiga ûiǂuis disa. 

Namibiab ge !nona !âgu !nâ gui ǁîs a ǀoro !khō!oamarisa ǁguiǂuihâ, hîa ǀhû-ǁarebese ge ūhe ǁnâugudi xa ra ǂkhâ!nâhese, hîab ministera hoa !kharaga sîsengu ǂnûiǂgādi hoadi !aroma nî sîsenxase ge mîmāsa, Sîsengu ǂHanumās di 71ǁî !Âb !nâ a !khōǂgāsase. Sekuritaitn ge N$8.75 ǀgui ira, ǂgarib !âba N$6.00 ira tsî ǂûna ra xawase, omkurus tsî ǂnuwis !âb hîa ǁîb a ǂam !gôaba N$17.83 ai ira ra mātarehese. Nēsi mā mātares ǁgâussenaon dib ge N$9.03 ai ǀgui ira mā. 

Nē kurib di Gamaǀaeb ais ge Kabinetsa ge !khō!gâ N$18 ǀgui iri ai nî mātarehesa tsî ǁnāti Sîsengu ǂHanumās !nâ nî ǀkharaǀkhara. ǀGū-ǁaeb ge sîsengu ôa!nâ-ao tsî ǁkhāti a aiǂnû-aob Sâuǁkhāsib tsî Hûhâsi ǂHanu-aisib ǂGaes dib, Herbert Jaucha ge mî hâ i, NMC di sîsenxa kaihes !onkhaohâsa. “Nēsin ga N$18 ǀgui ira a mātares tsînan ge nē sîsenao-na noxopa hoa ǂhâsiga dīǀoabasen ǁkhā tide, xawe !gâi a !khais ge hōǂgāmaris !gâi ǀkhā ǁga ra !oasa,” tib ge ge mî.