Auleria Wakudumo

Ehangano loku andjaneka omeva moshilongo loNamWater otali ka ninga omapekapeko li mone ngeenge ovalongifi vomakwafo oo hali yandje ova wanenwa komayakulo.

Omupopiliko woNamWater Lot Ndamanomhata okwa yelifa kutya omapekapeko avo taa ifanwa ‘External Customer Satisfaction Survey’ okwa kwatela mo okupula omapulo kovalongifi vomakwafo. Hano omapekapeko otaa lalakanene okuyambula po omayakulo haayandjwa kuNamWater, okunghonopaleka ekwatafano pokati kovakwashiwana naNamWater noku eta po omalunduluko taa pumbiwa, oku ningwa opo li yandje omayakulo elixwa po. 

“Epekapeko eli ola fimana mokumona kutya keshe Omunamibia oku na omeva a wana, otaa dulu okufuta omeva, nota longifa omeva ongushu, osho sha fimana mokukalamwenyo komunhu keshe oshoyo mexumokomesho loshilongo,” Ndamanomhata yelifa.

Kakele kokukonga omauyelele, epekapeko ola nuninwa yoo okulundulula vati omayakulo noku yandja omayakulo e li pondjele imwe neemhumbwe dovakwashiwana. 

“Mekufombinga loye, oto tu kwafele okutofa mo imwe oyo ya pumbwa elundululo, nokukala nekwatafano la kola,” Ndamanomhata ta ti. 

Epekapeko laNamWater olili komalungula, lina oupulo va xupi kombimga yomayakulo aNamWater. 

Amwe omomapulo otaa pula ongushu yomeva oyo NamWater ha yandje kovakwashiwana, omeva ngeenge a pata, ohaa pate efimbo li fike peni, ekwatafano pokati kaNamWater novalongifi vomayapulo avo okuli ngahelipi, okufuta omeva, omukalo woye wokufuta, omakemo oshiwana, noshoo tuu. 

Ndamanomhata okwa ti kutya epekapeko otali ulike elitulemo laNamWater mokukwafela oshiwana shi fike pamwe, olitulemo meemhumbwe doshiwana nokulundulula omayakulo avo sheli kwatelela keemhumbwe doshiwana. 

“Onghene ohatu indile ekufombinga mepekapeko eli, ove toli andjakaneke navakweni. Ohatu ka shiivifila osho sha monika okudja mepekapeko novakwashiwana aveshe,” Ndamanomhata ta ti.  -wakudumoauleria@gmail.com