Charles Ndeumane
OSHAKATI – Ongeshefa yoShoprite onkene tayi tsikile nokugandja iikulya yoshali koshigwana onga omukalo gwoku pandula aayambidhidhi yayo oshowo oku kondjitha ondjala.
Okuza sho Shoprite a tamekele oku gandja osopa, oomboloto, oshowo omayapula miitopolwa yomonooli yoshilongo omumvo gwaziko muNovomba, anuwa ohaya palutha konyala aantu yeli 500 lutatu moshiwike – mOmaandaha, mEtatatu, oshowo mEtitano kehe oshiwike shoka tashi eta omwaalu paantu yeli 1500 moshiwike.
Gumwe gwomaaniilonga yaShoprite mboka haya ende taya andajakaneke iikulya mokaloli Ndilimeke Fernandu okwa ti aantu ohaya kala ya nyanyukwa oku ya momalukanda gayo.
“Ohatu ende nokaloli haka okuya komahala ga yooloka unene ngaa koosikola ashike ohatuyi nomomalukanda oshowo puupale womaudhano uuna puna nande ootonamenda ndele etatu topolele aantu iikulya. Ohatu gandja unene osopa ashike ethimbo limwe ohatu gandjawo oombooloto nomayapula ngele gelipo,” Fernandu ta ti.
Fernandu okwa ti moku gandja iikulya ngaaka Shoprite ota shunitha moshigwana opo a ulikile aambidhidhi ye kutya okwa pandula, oshowo oku kwathela moku kondjitha ondjala oshoka aantu oyendji otaya si ondjala pethimbo ndika.
Omuniilonga omukwawo gwaShortite ngoka naye ha ende nokaloli hoka Walde Ndeiweda okwa ti moku enda taya hawaleke iikulya okwa koneke kutya aantu otaya si ondjala.
“Sho hatu ende tatu gandja iikulya otwa mona kutya moshilongo omuna ondjala lela muka. Ethimbo limwe oto mono aantu ya geya lela taya undulathana opo ya pewe iikulya. Ngele twayi momalukanda owu wete kutya aantu yamwe oyeli ashike pomalovu ndele oyasa ondjala lela, ngele omupe okabaki kosopa otomono kutya okwali asa ondjala shili,” osho Ndeiweda a popi ngaaka.