Auleria Wakudumo
Omukulunhuwiliki welelo lodoolopa yaGrootfontein Indileni Lungameni okwa ti elelo lodoolopa yavo ola ninga omatokolo opo li lukile eedjo dopaushitwe, va lukila unene oikwamina hai hangwa moshitukulwa shaashi vati inava hala okulukila ovanhu.
“Inatu hala okutameka nomadina oohandimwe, shaashi ohaa eta omananafano. Opo nee tu keelele omananafano, otwa dilaadila okutala koinima oyo ya fimana, nohai hangwa momudingonoko wetu,” Lungameni ta ti.
Elelo lodoolopa yaGrootfontein ola lukila omapandaanda 27 molukanda Omulunga Extension 2 eedjo dopaushitwe odo tadi hangika moshikandjohoololo shaGrootfontein moshitukulwa Otjozondjupa.
Omapandaanda oma pewa omadina ngaashi cooper, diamond, magnesium, nosho tuu.
Omadina omapandaanda ohaa pukulula ovashingi, ovakwashiwana, ovatalelipo, osho yo okupukulula omayakulo osheendelela ngaashi eeambulansa, nopolifi.
Mayola waGrootfontein Talitha Garises okwa ti shaashi vati kapa li pe na okomitiye yokuluka omapandaanda, eenhele dihapu momalukanda ngaashi mOmulunga, oo kwali hau ifanwa Soweto, oda kala inadi lukwa nghene oshilongo sha monene emanguluko.
“Nande eumbo molukanda lonhumba ola pi, opolifi otai dulu paife okupewa edina lepandaanda opo i dule okufika noupu meendelelo. Omadina omapandaanda ohaa pukulula ovanhu moinima ihapu,” Garises ta ti.
Elelo lodoolopa yaGrootfontein vati ola shaala neenhele ile omalukanda 12 ehe na natango omadina. Osho shi li vati shidjuu unene tuu okuyandja omayakulo amuni momalukanda omo.
Eluko lomapandaanda la shikula ko vati otali ka ningwa moExtension 4, notava ka tala vati komaludi oinamwenyo oyo hai dana onghandangala moshitukulwa.
Omanga Extension 3 vati tai ka lukilwa ovaleli va fimana muAfrica.