Auleria Wakudumo
Minista womayambulepo eedoolopa nomikunda Erastus Uutoni pamwe nelelo lodoolopa yaPuwo ova yandja omaumbo 30 koovenhe Etitatu. Omaumbo okwa fikwamekwa po mekwafo lopashimaliwa koproyeka yoTrust Fund, nokwa tungwa koprogramma yoBuild Together.
Uutoni okwa ti ouministeli womayambulepo eedoolopa nomikunda otau twikile okulongela kumwe nomahangano oshoyo eeproyeka dopaumwene ngaashi oBuild Together, oShack Dwellers Federation of Namibia, neeproyeka depangelo opo va yandje omaumbo ondado tai dulu okufutwa kovakwashiwana.
“Ohatu twikile okukwafela eemhangela da etwa po komalelo eedolopa da yooloka ngaashi oprogramma yokutunga pamwe ano Build Together oshoyo oungudu vovakwashiwana veli tula kumwe ngaashi Shack Dwellers Federation of Namibia, oyo tai lalakanene okuyandja omaumbo kovaNamibia vena oyuuyemo ili pedu opo tu finde omashongo omaumbo a taalela Ovanamibia vahapu,” Uutoni ta ti. Uutoni okwa pandula elelo loTrust Fund eshi la itavela okuyandja ekwafo, la longa noudiinini okukwashilipaleka kutya omaumbo okwapwa okutungwa.
“Ohandi indile omalelo eedoolopa opo akwashilipaleke kutya oimaliwa yomaumbo ya yandjwa kutya okudja kepangelo loovene ile omahangano opaumwene a yooloka ngaashi Trust Fund, oa longifwa ngaashi a nuninwa noimaliwa oyo tai ka futwa kwaavo va mona omaumbo oya tuvikilwa i ka kwafe eemhumbe domaumbo monakudiwa,” Uutoni ta ti.
Uutoni okwa kumaida oovene vomaumbo ape opo va kwafele yoo Ovanamibia vakwao, va mone omaumbo ngaashi voo va mona omaumbo. “Ohandi indile opo mufute oishoshela yeni yomaumbo, mu fute yoo eengunga deni domaumbo. Otamu ka pewa oaccount yelelo doolopa yoBuild Together Revolving opo mu kwafele vakweni va landula ko,” Uutoni ta ti.
Omunashipundi woTrust Fund Nghidinua Daniel okwati nghene ehangano latotelwe mo2001, ola kwafa eeproyeka dihapu medoolopa da yooloka moshilongo.
“Okudja 2002, ehangano ola longifa oshimaliwa sha fika peemiliona N$668 okukwafela okutunga nokukwafela omaumbo,” Daniel ta ti.
Daniel okwati otava pandula elelo lodoolopa yaPuwo eshi la tula eemhumbwe doshiwana shavo komesho mokupula ekwafo koTrust Fund opo li kwafele okuyandja oshimaliwa opo omaumbo a dulwe okutungwa.
Oproyeka otai ulike kutya elongelo kumwe lepangelo, omaleleo edoolopa, oshoyo omahangano opaumwene otaa dulu okulongela kumwe ndele tava hange omalalakano pamwe.