Omupedu minista koshikondo shokutonatela oshiwana shovayelele novanhu ve li konima yefiya, Royal Johan \\Uiloloo okwa ti osha fimana ngeenge ounona voshiwana shovayelele navo tava pewa ehongo lopetameko.

“Ounona aveshe nava longwe okulesha, okushanga nokuvalula manga ve li peedula dopetameko,” ta ti.

Edi \\Uiloloo okwe di popya oshivike sha dja ko pefimbo kwa li ta patulula pambelewa endiki olo la tungwa koBravo moshitukulwa shaShikoto.

Endiki lounona ola tungwa koshimaliwa shongushu yeemilliona eeN$5.3.

Endiki la tungwa kehangano loPalsm for Life nelalakano lokuyambidida ounona voshiwana shovavelele.

Okwa didilikwa ounona voshiwana shovayelele va taalela omashongo oku ya keetundi unene tuu ovo hava di komikunda.

Okwa ti mopaife ngaha moshitukulwa shaShikoto omu na omandiki okuyandja ehongo kounona aahetatu.

\\Uiloloo okwa popya ta ti endiki ota li ka kala ounona ve li dulife 100 omo tava ka pewa eetundi doinyangadalwa ya yooloka.

Okwa weda po ta ti kendiki ota ka longela ovahongifikola vahamhano.

“Ovahongifikola ova pewa nale omadeulo kombinga nghene ve na okulonga nounona,” ta ti.

Omupedu minista okwa ti ounona otava ka kala tava telekelwa oikulya efiku keshe.

Okwa yelifa ta ti osha fimana ngeenge ounona tava pewa eetundi molwashi otashi va tu omukumo wokuya keetundi.

“Endiki e li ota li ka yambidida ounona hava di pomudingonoko opo,” a weda po ta ti.

Okwa ti ombelewa yaye otai twikile okuyambidida oshiwana shovayelele koitukulwa ya yololoka.

“Oshiwana shovayelele oha shi pewa oikulya noshoyo omakwafo ya yooloka okupitila mombelewa yange,” ta ti.

Okwa weda po ta ti neudo okwa talela po omandiki opo ha pa di oshiwana shovayelele koshitukulwa shaHangwena.

“Onda didilika omashongo oo ataalelwa kovayelele. Onda popya novayelele opo vaha longife oikulwifa ihapu noshoyo va kale nombili nokukwata nawa oshimaliwa shavo,” ta ti.

Ovadali hava di pomudingonoko opo pa tungwa endiki lounona ova pandula molwashi paife ounona vavo otava ka pewa ehongo lopetameko. – fhamalwa@nepc.com.na