Opolifi oya kumaida ovadali opo vaha tume vali ounona ve li koshi yeedula 18 keendingosho. Onghela, ombelewa yomupopiliko wopolifi omupedukomufala Kauna Shikwambi oya pitifa omushangwa tau kunghile kutya okutuma ounona keendingosho oshinima shi li kondje yoveta. “Kape na okaana ka pitikwa okuhumbata omalodu. Ounona inava pitikwa okuya meendingosho,” ta ti.

Okwa ti omukulunhu keshe ta ka monika ta humbateke okaana omalodu ota ka pewa ehandukilo lopaveta.

Shikwambi okwa kumaida oshiwana opo shiha ninwe omaludo keshe pamwe molwaashi eenhele dimwe inadi pitikwa okunwinwa omalodu. Okwa popya ta ti oovene veendingosho nosho yo eengeleka nava xulife po okuninga omaweelelo unene tuu pefimbo e li ovanafikola tava shange omakonakono axuunina. 

Okwa weda po ta ti ovanhu tava ka ninga oivilo nava ninge ewelelo li li pedu. “Otwa didilikwa eendingosho noshoyo eengeleka hadi ningi eweelelo efimbo ngeenge ovanhu va kofa ile ovanafikola tave lihongo,” ta ti.

Shikwambi okwa ti ovanhu nava landife omalodu she likwatelela komikanda deendingosho davo.

“Opolifi otai ka ninga oikonga keendingosho opo ku talike kombinga yovanhu itave liufa komilandu da tulwa po,” ta ti.Okwa weda po ta ti omunhu keshe ite ke liufa komilandu ota ka pewa ehandukilo lopaveta.

-fhamalwa@nepc.com.na