• Omunangeshefa (64) anuwa a
gandja ombumbo a kwate
okakadhona koonkondo
• Omulumentu (46) akwatwa
omulumentu (44) koonkondo
ONGWEDIVA – Opolisi moshitopolwa shaShana oya manga po aafekelwa yaali gumwe omunangeshefa a tseyika nawa mOshakati gwomimvo 64 ngoka anuwa a kala nokufuta ombumbo opo a ye miihulo nokadona komimvo 17. Omufekelwa omutiyali, omunamimvo 38, anuwa yinagona yokakadhona hoka. Yinagona nguka anuwa ha zi megumbo limwe nokakadhona otaku hokololwa a kala teka gandja po komungeshefa, ye ta taamba oshimaliwa. Opolisi otayi ti okakadhona oko kene ka patulula oshipotha. Omupevikuluntu gwopolisi moshitopolwa shaShana Commissioner Frederick Ndjadila okwa ti okanona hoka oka kala noku kwatwa koonkondo okuza muJanuali sigo Okotomba nuumvo shaali pehali lyako.
Otaku hokololwa omunangeshefa ngoka a tseyika omolwa omatungo omanene taga hiilwa mOshakati ngaashingeyi e li moshipangelo, miikaha yopolisi oshoka anuwa okwa nika uunkundi.
“Omunageshefa ngoka anuwa okwa kala haka tala okanona hoka kaandjawo, nepitikilo lyayinagona ye ta futu oshimaliwa shontumba, noku ya nako miihulo kaashi li pahalo lyako,” ta hokolola ngaaka.
Shika anuwa osha ningwa iikando oyindji moka shahuguninwa shaningwa muKotomba. “Omunangeshefa ngoka okuli moshipangelo a kalelwa kaapolisi, nuuna a ti po hwepo, opo otaka holoka mompangu,’’ ta ti ngaaka. Ndjadila okwa ti, otaya konakona oshipotha oshitiyali sha patulilwa aapolisi yamwe sho anuwa ya egulula mo omunangeshefa ngoka mondjeendhililo shaali paveta, eta ye mu fala koshipangelo. Ta ti oonakukutha mo omufekelwa ina ya landula omilandu ndhoka hadhi landula ngele omunandholongo ta falwa koshipangelo.
Aantu yamwe yeshi aafekelwa mboka ayehe yaali nawa inaaya hala okupopiwa komadhina oya ti, aafekelwa ohaya monika pamwe onga ookuume. Ashike mumwayinamati gwomukiintu ngoka a mangwa po, ye natango ohekulu yokanona okwa li a gamene mumwayina ta ti okanona inaaka landithwa po shili.
“Okanona hoka inaka gandjwa po, mumwameme okwa mangwa po minima kaayi shi yoshili,” ta po pi ngaaka.
Ta gwedha po kutya yina yokanona hoka okuli kombuga, naye okushishi kutya okanona ke ihaka uuvuko, nokosikola iha kayi we. Moshiningwanima shimwe inaashifaathana, omulumentu gwomimvo 44 anuwa okwa kwatwa koonkondo komulumentu omukwawo gwomimvo 46, ngoka haya zi megumbo limwe naye.
Oshiningwanima osha holoka momukunda Eendama moshitopolwa shaShana. Ndjadila okwa hokolola kutya omulumentu ngoka anuwa okwali aadhika tiikosho, eta lombwelwa alandule omufekelwa kiihwa.
“Anuwa okwali e mu lombwele ihule eta pilameneko, ihe okwa tindi. Omufekelwa okwali a vulu omulumentu ngoka oonkondo ete mu kwata koonkondo, nokumuningila iinima yimwe iiwinayi natango,” ta ti ngaaka.
Opolisi oyili metifa okukwata po omufekelwa.