Jazema Hangero 

“Omundu tji wa undju komundu warwe mo wombo omuini nu mo kasenina amo yandja ondjo kovandu varwe mena roungundipare woye omuini. Ouye mbwi owokurikondjera kawokuundja komundu warwe.”

Omutanda epatje ngwe kurira na nyandere mOngama, Maketira Kambazombi, ma tja. Na ryama komurungu kutja ouye wa runduruka, oviṋa kavi ri otja tji ve vi vazere. Novakwao vane ve kondja ouwa nomake wawo moukoto mOtjomuise monganda indji OMK Leather Practice Investment CC. Ve ungura tjamwa otjiṋa tji tji za pomukova: ovihaamwa, ozondjaṱu zomomake, ovitjapu, omakwamo, ovitoma, omitjira nozombuku, ozongaku zomivya nganduu kovisara. 

Otjisara otjikuru tji matji hepa ombango ve yenena okuṱuna atji kotoka mongaro. 

Katjisupi omutengwa Kambazombi we yere poruveze orutenga mombatasaneno yovimemwa vyokomake kovitjitwa vyombazu kOmbu. “Ouzeu mbu tu muna tjinene ouhepe voviungurisiwa vyouye wakandino tjimuna ozomahina zokutopora nokuṱuka omikova, ingee nai omikova tu topora komake.”

Tji tjiri otjiungura otjizeu tjinene oruveze ndu ve noviungura ovingi.  “Omatokero warwe okuṱuka omukova, tu ṱuka komake. Kambazombi ma tja. Kangamwa omundu omuharupu ngu ma yenene oku ve vatera nozomahina zomikova kokutja oviungura vyawo vi kawondje komurungu nu ve yenene okukuta omitanda mbi ri pehi nokuveza otjivarero tjovaungure ma rire ombatero onene tjinene. 

 Onganda yawo ye ritjangisa kotjiveta mo 2016, nu tji pe nomundu ngu ma vanga okurikuta poo okurikwamba kuwo ma ya kurwa.    Kambazombi ma tja oviungura mbi we rihongera ponganda uriri, noviṋa mbi ri mombinḓu. Ma ningire omitanda okupita momanyando nomahore nge ha tungu nu vi pahe okuriungurira ouwa nomake. “Kape notjiṋa otjiwa tjimuna okuriungurira orondu u kara nouyara nousemba ouhara.” Ma tja omitanda avi   rihahiza, nu tji pe na ngu nouungura wokomake e rihahiza ondjira komurungu mai kanyotoroka. Kondjivisiro yokomurungu ma mu paha Kambazombi konomora ndji 0814890313.