Omupresidente omukulu Hifikepunye Pohamba  okwa indile Aanamibia ayehe taya kutha ombinga momahohololo opo ye shi ninge pambili nopalandulathano nopambili.

Pohamba okwa ningi eindilo ndika pethimbo a hogolola poPrimaskola pOkanghudi mOshitopolwa shaHangwena ongula yonena.

Pohamba pethimbo a hogolola okwa lia a waiminwa komunyekadhi gwe Penehupifo Pohamba. Ngoloneya gwaHangwena Sebastian Ndeitunga, Omukuluntu gwOpolisi mOshitopolwa shaHangwena,  Ottilie Kashuupulwa nayo wo oya yi kopilima sikola yaKangudi hoka ya ka hogololela.

Konyala aaleleli ayehe yopashigwana, mwa kwatelwa yoongundu dhopapolitika oya hogolola nena, ya hogololele komahala gawo. Mokati kayo Omupelesidente Nangolo Mbumba, Omukokoli-presidente Sam Nujoma oshi woOmuulikwa gwoSwapo Natumbo Nandi-Ndaitwah mboka ayehe ya hogololele moWindhoek. 

Aaleli yahogololelele kondje yoWindhoek, oEpafras Mukwiilongo gwoNEFF ngoka a ti kutya oku na etegelelo kutya ongundu ye otayi ka yanga ta po omawi ogendji momahogololo. 

Mukwiilongo pamwe nomupeha gwe Kalimbo Iipumbu oya hogololele kOkatana moshitopolwa shaShana. Oya ti oNEFF oyi na aalanduli oyendji aagundjuka noye na einekelo kutya otaya ka hogolola ongundu yawo.

Omuulikwa presidente gwaAR Job Amupanda naye okwa ti oku na einekelo maagundjuka yaNamibia oshoka otaya ka hogolola elunduluko nonakwiiwa yoshilongo yili nawa. Amupanda okwa hogololele pOmaalala poshikandjohogololo Ondangwa Urban. Okwa ti shika oshi oshikando shotango ta hogololele moshitopolwa nomomukunda gwaandjawo. Oyali ya yi komahogololo nayinakulu. 

Omuleleli omukwao a popiwa naye koshikundaneki shika, oBernadus Swartbooi gongundu yoLPM. Swartbooi okwa ti oku shishi nawa kutya ongundu ye oyo tayi ka sindana po omahogololo gonuumvo.

“Ondi shishi nawa nonda kala aluhe ndi shishi kutya oLPM oyo tayi sindana po omahogololo. Ngele otwa kala inaa tu sindana otwa nyokomwa,” Swartbooi ta ti.

McHenry Venaani gwoPDM ye okwa hogolololele koshitopolwa shaTobia Hainyeko koKilimajaro Lutheran Church hoka ta ti aanambelewa yomahogololo oya enda kashona. 

Okwa ti wo ina panda sho a pewa ompito opo a hogololele tanga, na okuuvite kutya Aanamibia mboka ye li moluhepo inaya tali ka ko. Okwa pula oshigwana shi hogolole elunduluko ngaashi lyaningwa miilongo iikwao yaAfrica.