RUACANA – Esiku lyomahogololo olya nyanyudha aakalimo yomoshitopolwa shaMusati sho ya kwata ondjuhwa komulungu Etitatu, ya ningi omikweyo yali ya tegelela okuhogolola.
Aanambelewa yomahogololo mboka yali ya yi moonkundathana noshifokundaneki shika omanga inaashi ka nyanyangidhwa oya ti inaya mona uupyakadhi wa sha pomahala gawo.
Aakulupe naanyasha oyali ya holola nkene yuuvite nawa sho ya hogolola, yamwe oyali yahala ngeno oya mana nale. Elenga enene lyOmbalantu Oswald Mukulu oye a li gotango okuhogolola pehala lyelelo lyopamuthigululwakalo kOutapi, moshitopolwa shaMusati.
“Onda penduka ongula opo ndi hogolole, onkene otandi kumagidha wo oshigwana shiye mehwata shi ninge shoka shili mondjila,” ta ti ngaaka.
Ngoloneya gwoshitopowa shaMusati Erginus Endjala okwali ithana nokumagidha aakalimo ya ninge shoka shili mondjila.
Ta ti okuhogolola etokolo lyomondjila onkene oshigwana otashi ningi nawa sho sho tashi ulike esimano lyuuthemba wa wo okupitila moku hogolola.
“Ongula shili ihe omikweyo odhuudha oshigwana, shoka tashi holola kutya oshigwana oshuuviteko uuthemba wa wo oshowo kutya omahogololo otaga ti ngiini,” ta pandula aakalimo.
Endjala okwa ti, oya tegelela iizemo nena. Omukulunutu gwopolisi moshitopolwa shaMusati Ismael Basson okwa ti moshitopolwa ka kwali mwa lopotwa sha sha puka sigo ethimbo ndyoka a li moonkundathana nomutooli nkundana nguka.
“Sigo ompaka aakalimo oya ihumbata nawa shoka tashi nyanyudha, nondina omukumo kutya otashi tsikile nombepo ndyoka ombwaanawa,” ta po pi ngaaka.
Maria Shivute gokOshifo okwa ti okwa meneka po04h30 nelalakano lyokuhogolola mbala ye a shuna kegumbo.
Ta ti, okuuvite nawa oshoka omukweyo okwali tagu endelele naanambelewa oyali taya ya kula nawa oshigwana.
“Inandi tsakaneka po nando uupyakandi wa sha. Otuuvite komahala gamwe aantu ya thikama omanga yeli momikweyo ihe se otwa kuutumba,” ta po pi ngaaka.
Mbatjua Mbamuna omukalimo gwomoRuacana okwa ti ye okwa hogolola oshoka okuuvite kutya omahogololo otaga ti ngiini.
“Kashina kutya oto hogolola ongundu yini shoka shili mondjila oshoka kutya owa hogolola opo e wi lyoye lyi yalulwe,” ta ti ngaaka.
Mbamuna okwa kumagidha mboka inaaya hala okuhogolola kutya naya lundulule omatokolo ngoka ga puka e ta ya kala taya ningi shoka shili mondjila omolwa uuwanawa woshilongo.
Aatolinkundana yiikundaneki ya yooloka komalungula oya lopota kutya omahala gamwe ogali ga pwa oombapila dhokuhogolola omanga otundi o ne yokomatago inaayi dhenga.
Natango okwa li kwa tengenekwa okugwedhelwa esiku limwe lyoku hogolola oshoka ooowili okwali tadhi tondoka ihe omahala gokuhogololo oguudha aantu natango.