Okudja omudo 2023 fiyo oneudo okwa lopotwa oibofa ili 4814 yomahepeko omomaumbo mwa kwatelwa ounona.

Oibofa oya kwatelamo odipao, omakwatonghonga noshoyo ovanhu nomamonofo oiponga.

Edi oda popiwa kuminista woukashike kookanhu nonghalo nawa yokaana Doreen Sioka Etivali pefimbo ledimbuluko lefiku lokukelela oimbuluma mounyuni la li moWindhoek.

Omudo keshe mounyuni momafiku 25 Novomba oha ku dimbulukiwa efiku lomahepeko omomaumbo.

Efiku e li ota li ka dimbukiwa koitukulwa ya yooloka moshilongo.

Sioka okwa ti oshitukulwa shaKhomas osho shimwe sha lopotwa omivalu 758 di li pombada domahepeko omomaumbo, sha landulwa koshitukulwa Erongo nomivalu 493.

Oshitukulwa shaShana osha lopotwa omivalu 473 dovanhu va ningilwa omahepeko omomaumbo.

Minista okwa ti ouministeli waye otau ka tota po eeporongalama dokukelela omahepeko omomaumbo.

“Ohatu lalakanene okulela omahepeko omomaumbo unene tuu ovakainhu tava di pawa,” ta ti.

Sioka okwa ti ounona ova ninga  oihakanwa yokudengwa nokukwatwa onghonga.

Ovalumenhu navo ova ninga oihakanwa yokuhepekwa kovakainhu vavo ngaashi okudengwa,” a weda po.

“Ovalumenhu ka leni ta ka konga omakwafo kovaxungimwenyo ile kovafitaongalo ngeenge ta muhepekwa komadilaadilo”.

Okwa weda po ta ti okukakonga omakwafo kovaxungimwenyo ita shi ti  kutya omulumenhu e vaya ndele otashi kelele omunhu aa ha longe oshimbuluma.

Sioka okwa  ti ouministeli waye owa kendabala nokuninga omitumba dovalumenhu da nuninwa okukelela oimbuluma.

Okwa kumaida oshiwana opo shi longele kumwe momidingonoko davo okukelela omahepeko oukashike kookanhu.

“Omahepeko omomaumbo naa lopotwe pefimbo kopolifi opo ku kelelwe oiponga nomafyo,” minista ta ti.

Minista okwa lombwela oshiwana opo shi xulife po okuamena ovapambele wavo ngeenge tava hepeke ovanhu momaumbo.

-fhamalwa@nepc.com.na