Omupopiliko wopolifi moshitukulwa shaHangwena Warrant Andreas Nghiyolwa okwa ti fiyo opaife kape na omunhu a kwatwa po mekwatafano ledipao lomuhongifikola Natanael Thabo Nghihalwa.

Okwa koleka ta ti paife ngaha opa pita odula imwe ashike kape na ouyelele woumbangi womondjila.

Nghihalwa weedula 40 okwa xulifa omudo wa dja ko momafiku 11 Novomba eshi vati a yashwa nondjebo kuwalye.

Oshiningwanima osha ningilwa meumbo lavo efimbo loufiku momukunda Oshikwiyu moshitukulwa shaHangwena.

Otaku hokololwa kutya omulumenhu ou okwa dja pondingosho yaye i li mOmungwelume ndele ta i keumbo e ke likoshe.

Opolifi oya hokolola tai ti omulumenhu ou okwa yashwa kuwalye molwaashi kape na ouyelele.

Okwe lituwa kumumwainamati a nangala   poshivelo shonduda yaye e li mekungu lohonde.

Efiku olo omalola otuwa yaNghihalwa okwa  tetwa nomakatana.

Nghihalwa okwa li ta longele kofikola Oshali West Combined.

Umwe womwumainamati waNghihalwa okwa ti opolifi itai longifa ouyuuki okukonakona oshibofa shefyo lomumwainamati.

“Ope na omunhu ta fekelwa ashike opolifi oya dopa okukala ya ningila omunhu oo omapulapulo,” ta ti.

Okwa ti paife opolifi oya mwene molwashi kai na ko nasha.

“Fye ongofamili katu udite ombili molwefyo lamumwamememati. Ondenge yange itai dulu okukana ngaho,” ta ti. -fhamalwa@nepc.com.na