Auleria Wakudumo 

Omulumenhu weedula 33 okwa kwata okakadona keedula 19 keenghono manga ka li ka kofa shaashi oka li koshi yodungo. Oshiningwanima osha ningwa Olomakaya, sha ningilwa koWesterkim, Karasbug lwopo05h00. 

Omupopiliko wopolifi, Deputy Commissioner Kauna Shikwambi okwa koleka oshiningwanima eshi. 

Shikwambi okwa holola ta ti nakuningwa oshihakanwa pamwe nomaume aye, ova dja kokalaba nomufekelwa vati okwa pula a pewe omulele oufiku oo komafelende anakuningwa oshihakanwa. Omufekelwa vati okwa pewa omulele moseti omanga oukadona va nagala meenduda davo. Vati nakuningwa oshihakanwa okwa pendulwa mo ashike komufekelwa temu kwata nale keenghono. Omufekelwa okwa tulwa moipandeko. 

Oshiningwanima shikwao osha ningwa Olomakaya, sha ningilwa kolukanda Kuvukiland, moshitukulwa shaShikoto lwopo04h00 eshi omulumenhu weedula 24 ta fekelwa a kwata okakadona keedula 18 keenghono. 

Oshiningwanima osha kolekwa kuShikwambi, vati omufekelwa okwa ya keumbo lakahewa kaye wopaihole nokwe mu hanga ve li monduda nanakuningwa oshihakanwa. 

Konima vati omufekelwa nakahewa kaye kopaihole ova ya meenhamanana nokakadona kaye oka dja mo monduda ka ka nangale pamwe vali. 

Konima vati eshi okakadona kaye ka dja mo monduda, omufekelwa okwa kwata felende wokakadona kaye keenghono. 

Natango oshiningwanima shikwao, ovalumenhu vavali aveshe ve na eedula 21 ova kwata okakadona keedula 23 keenghono. 

Oshiningwanima osha ningwa Olomakaya pefimbo lihe shiivike kolukanda Aroab. 

Vati okakadona navakwao ova li tava 

denge omangadja meumbo lovafekelwa ndele taka kofa. 

Ovafekelwa vati ova kwata okakadona keenghono manga ka kofa naashi ka penduka umwe vati okwa nangala pomunghulo wako omanga umwe a nangala ketyofa monduda omo tuu omo. Ovafekelwa aveshe ova tulwa moipandeko. 

Oshiningwanima shikwao, omulumenhu weedula 25 okwa kendabala okukwata okamwainakadona keedula hamano onghonga Olomakaya lwopo 15h30 momukunda Okaliveva moshitukulwa shaShikoto. 

Vati omufekelwa okwa kufa okaana konduda yavo yokunangala ndele te ka twala konduda yaye e ka heka ka ka tale vati oululi kongodi yaye. 

Mokufika vati monduda, omufekelwa okwa hangelelwa kuumwe womovaneumbo. Omufekelwa okwa tulwa moipandeko. 

Oshiningwanima shikwao, omulumenhu weedula 32 okwa kata felende waye wokakadona weedula 18 keenghono konima eshi vati e mu ufana va kalepo oule woshivike. 

Oshiningwanima osha ningwa Etitano lwopo 22h00, sha ningilwa koAriamsvlei. 

Omufekelwa vati okwali e li koshi yodungo mokulonga oshima eshi. 

-wakudumoauleria@gmail.com