OUTAPI – Minista wouhaku nomayakulo opashiwana Dr Kalumbi Shangula okwa ti ouministeli waye otau twikile okuandjaneka omayakulo opaunamiti molwaashi osha fimana ngeenge ovanhu ve na oukolele.

Edi minista okwe di popya onghela pefimbo kwa li ta patulula pambelewa endiki lomikifi domukwayu la tungwa moshipangelo shOutapi.

Endiki ola tungwa li na eembete 30 noilongifo youhaku ya yooloka.

Oshipangelo shOutapi osha pewa oilongifo youhaku ya yooloka mwa kwatelwa eetenda dokuninga omandiki ouhaku komikunda.

Endiki louhaku eli otali ka longifwa ngeenge kwa monika omunhu a kwatwa komikifi domukwayu.

Minista okwa popya ta ti oilongifo i li mendiki  otai ka etela oshiwana omauwa ngeenge tashi ya pamayakuko ouhaku.

Shangula okwa ti ovanhu tava kwatwa komikifi domukwayu otave ke li ka lekelwa opo ku kelelwe etandavelo lomikifi.

Okwa weda po ta ti endiki otali kwafele ouministeli waye okulilongekida ngeenge kwa monika omikifi domukwayu.

“Omunhu ngeenge e na oukolele ota dulu okulonga oilonga yaye nawa nosho yo okutonatela ovakwapata vaye,” ta ti.

Shangula okwa lombwela oshiwana opo shi longele kumwe okukondjifa omikifi da yooloka momidingonoko davo.

“Omikifi nadi lopotwe pefimbo kovanambelewa vouhaku opo ovanhu va pewe omayakulo opaunamiti,” ta ti.

Okwa kumaida  ovanailonga vouhaku opo va twikile okuyakula nawa oshiwana ngeenge tashi kongo omayakulo opaunamiti.

Ngoloneya woshitukulwa shaMusati Erginus Endjala okwa pandula ouministeli wouhaku molwokuyandjaneka omayakulo ouhaku moshitukulwa shaye.

“Omandiki ouhaku okwa fimana koshiwana opo shi dule okupangwa ngeenge tashi vele,” ta ti.

-fhamalwa@nepc.com.na