Minista wemona Iipumbu Shiimi okwa ti ovakulupe otava longo oshilonga sha fimana okutekula ounona komaumbo.
Edi Shiimi okwe di popya Etivali koshivilo shikilikimesa osho kwa li sha ningilwa ovakulupe kOshikuku.
Ovakulupe va dja komikunda da yooloka moshikandjohoololo shaShikuku okwa li va hafa okushakena navakwao.
Ovakulupe 500 lwaapo okwa li va ngudumana pombelewa yakansela tava imbi omaimbilo nokutyapula oshivilo shavo.
Oshivilo eshi okwa li sha unganekwa kombelewa yakansela waShikuku noshoyo oshipangelo shaShikuku.
Ovakulupe okwa li va pewa omaano a yooloka, omusha noshoyo omayakulo opaunamiti.
Shiimi okwa ti ngeenge kape na ovakulupe nena kape na ovakulunhu vokupukulula ounona novanyasha.
“Ohamu longifa oshimaliwa sheni shopendjela okuyambidida ovatekulu veni. Onde mu pandula molwaashi otamu longo nawa,” Shiimi ta ti.
Okwa ti ovanyasha vopaife ngeenge ova tovifa ounona vavo ohava twala ashike kovakulupe ndele tava i koushimba.
Okwa kumaida ovakulupe opo va twikile okutonatela ovatekulu vavo noku va longa outeku.
Shiimi okwa lombwela ovakulupe ta ti epangelo otali twikile okuyambidida ovakulupe ngaashi okutunga oipangelo nokuyandjaneka omiti.
“Osha fimana ngeenge ovakulupe ve li popepi noipangelo,” ta ti.
Kansela woshikandjohoololo shaShikuku Mathew Gabriel okwa ti ovakulupe ova fimana moshiwana, naashi osha eta opo ombelewa yaye i unganeke oshivilo shovakulupe.
“Ovakulupe vamwe momaumbo ohava di mo ashike ngeenge tava i kopendjela. Ondi udite etumba okukala nda hanganifa ovakulupe molwaashi otashi va ulikile kutya ova fimana notu va hole,” ta ti.
Gabriel okwa hokolola ta ti koshivilo okwa li ku na ovanailonga vouhaku mwa kwatelwa ovaxungimwenyo.
“Ovakulupe okwa li va ningilwa omakonakono ohonde ya londa. Okwa li va pewa omayakulo exungomwenyo,” ta ti.
Kansela okwa weda po ta ti ovakulupe okwa li va koshwa keemhadi nosho yo okutetwa oipanyala, nokufulwa komaulu.
Gabriel okwa ti oshivilo eshi otashi ningwa omudo keshe okuhanganifa ovakulupe.
Tresia Namalenga okwa hokolola ta ti okwa pandula kansela wavo eshi a unganeka oshivilo molwaashi ova ningilwa omauwa.
“Otwa koshwa keemhadi ndele hatu konakonwa ohonde ya londa nokuningilwa omadewo.
Inatu ningilwa nale omauwa oludi eli,” ta ti.