Auleria Wakudumo
Omukainhu weedula 44 okuli monghalo itai nuwa omeva molwaashi a yashwa vati noshikuti medimo komulumenhu weedula 32.
Eshi osha ningilwa momukunda Eexwa, mEenhana moshitukulwa shaHangwena, sha ningwa Etitano lwopo 21h30.
Omukulunhu koshikondo shokukonaakona oimbuluma moshitukulwa shaHangwena, Deputy Commissioner Melanie Mburuu okwa koleka oshiningwanima eshi.
Mburuu okwa holola ta ti nakuningwa oshihakanwa okwa li a tambulilwa moshipangelo shepangelo mEenhana ashike okwa ka tuminwa kOshakati opo a ka mone epango la wedwa po.
Otaku hokololwa vati omufekelwa a longifa outa noshikuti okuyasha nakuningwa oshihakanwa medimo ndele vati oshikuti tashi tekele medimo.
Opolifi inai holola natang kutya oshike sha eta omukainhu a yashwe. Omufekelwa vati okwa tulwa moipandeko,a patululilwa oshibofa shedipao nokwa holoka momhangu onghela.
Mburuu okwa weda po ta ti osheetifi vati inashi shiivika natango. Oshiningwanima inashi faafana, Okakadona keedula 20 oka nyekwa ongodi noN$10 komushingi wotaxi novalumenhu vavali ovo vali vafa ovatwaalelwa pamwe naye. Edi oda kolekwa komukulunhu koshikondo shokukonaakona oimbuluma moshitukulwa shaShana, Deputy Commissioner Frederick Ndjadila.
Ndjadila okwa ti vati konima ashike yokuhanga ofikola, omushingi okwa shingai a uka konima yofikola omanga ovalumenhu vavali ava vali konima tava kufa kakadona oinima yaye.
Vati umwe okwa kufila kakadona odjebo ndele ta ningile nakuningwa oshihakanwa omatilifo kutya otemu yashe ngeenge okwa keuka konima.
Ova nyeka nakuningwa oshihakanwa vati ongodi ina ongushu yoN$3 500 oshoyo oN$10.