Okapale komaudhano gotennis mOngwediva oka patuluka pambelewa Olyomakaya ga zi ko.
Okapale oka li ka opalekwa sho ka li ka ningi ethimbo ke li monkalo kayi shi okulongithwa.
Mayola gwelelo lyondoolopa yaNgwediva Taarah Shalyefu momushangwa gwe gwesiku, okwa popi ta ti, okapale hoka oka li ka longululwa noku opalekwa kondando yoshimaliwa shongushu N$598 909.31.
“Ondu uvite uuntsa osho wo olupandu nohole oshoka shika osha gwedha ko kongushu nokehumokomeho lyondoolopa oshowo okukutha aakalimo unene aanyasha momapandaanda,” ta ti ngaaka.
Ta ti, okapale haka okwa li ka tamekwa okulongwa muMalitsa nuumvo, nonando okwa li twa tengeneka taka pu muMei.
Oka li ka shunithwa monima komukithi gwoCorona.
“Otushi okupandula ehangano lyokontalaka ndyoka kwa li lya pewa oshinakugwanithwa shokulonga iilonga mbika, sho kwa li lya longo lyi itula mo nokugwanitha po ashihe elelo lyondoolopa lya li lya indile,” ta pandula.
Shalyefu okwa ti, okapale haka kotennis okashuwika nawa mOngwediva, noku na omukumo kutya otaka ka hila oyendji opo ya vule okwi ipyakadhila nomawudhano oshowo niinyangadhalwa ya yooloka.
“Ondi na natango omukumo kutya aakalimo otaya ka sila oshimpwiyu okapale haka, okukaleka po noku ka gamena kaaka yonuke po,” ta ti ngaaka.
Ta gwedha po ta ti, okapale hoka otaka ka gandja oompito dhomayinyanyudho dha yooloka, shoka tashi ka kaleke po oshowo okuxwaxwameka omawundjolowele gaakalimo.
Ta ti, elelo lyondoolopa lyaNgwediva olyi li metifa oku eta po natango uupale womawudhano ga yolooka koExtention 17.
“Uupale mboka otawu ka kala u na omahala gwomaudhano ga yooloka, opo aakalimo ayehe ya mone ompito yomainyanyudho ya hala,” ta fatulula ngaaka.
Sherizan Micheal gwomOngwediva okwa ti okwa pandula sho okapale kotennis ka patululwa oshoka oya ningi ethimbo taya mono iihuna. “Okapale ketu haka ohake tu kwathele oshoka nonando otwa hala okuninga omadhewo getu, itatu ka futa we oshoka out na ehala mpoka tatu ningile omadhewo getu,” ta hokolola ngaaka.
Ta ti, omadhilaadhilo gawo oge na ngaa shoka tashi kala tashi ga piyaganeke, uuna ku na omadhauno nenge omadhewo gwontumba.
“Oshi vulithe okukala twa kalela omagumbo, tse tu ka kwatwe komadhilaadhilo ga puka, ngaashi giikolitha niingangamithi,” ta popi ngaaka.