Omunafaalama Martha Ndeyapo Nuule okwa thamuna nkene iiyimati ya simana noyi na oshilonga monkalamwenyo.
Nuule, a yambukile mOshakati okwa ti, oku na oshikukino shiiyamati ngaashi omahapela, omalemune, omasiilemune, ugalanadila, omakwaava, omamengo, omatama, omabanana, ondungu, oonyanga, omiti dhomizile, omoringa oshowo oshimeno tashi ithanwa eggplant.
Oshikunino she oshi li molukanda Oneshila. Ta ti oshimeno shoka sho eggplant ohashi vulu wo okupanga iikwamawawa uuna yi na uupuka momandjandja.
“Oyendji oya itaala kutya iiyimati ngaashi omahapela nomalemune ihaga kunwa kaaluudhe, ihe okaatiligane ashike. Shoka epukitho moshigwana, ngame ondi shi oku shi kwashilipaleka oshoka oshikunino shandje oshi na iyiimati oyindii nde yi kuna mo nonda kolota ashike iishona yo muyo,” Nuule ta ti ngaaka.
Ta hokolola ta ti oshikunino she okwa li e shi toto po momumvo 2015, konima sho a li a dhimbulula kutya ita vulu okumona iihuna omanga e na oonyala nomadhilaadhilo e ga pewa oshali, konima sho a ndopa okumana eilongo lye.
Ta ti okwa li a tameke ta kunu oonti dhoshiyimati kehe ta li, ndhoka hadhi kwata ashike omasiku ngele ogendji gaheyali, dho odha tsipuka mo mevi.
Okwa li a tameke oku sika muundini uushona wokunwina nokulanditha koondola ntano.
Nuule ta ti, ongeshefa ye osho ya tameke ngaaka, sigo ya koko. Nena omiti dhiiyimati niimeno ye ohe yi landitha koN$30 kehe mukamwe.
Ongeshefa ye otayi ende lela nawa.
Okwa li afatulula ta ti oyendji ihaye shi itaala ngele ta popi kutya omiti dhomahapela nomalemune ohadhi vulu okutulu ko iiyimati.
Tati nuumvo okwa kanitha omuti gomalemune ngoka gwa li gwa tula ko omalemune taga aliwa ashike ogwa sipo oshoka ohagu pula omeya ogendji noonkondo.
Ta ti omiti ndhoka ohadhi pula oomvula dha thika puheyali okutula ko iiyimati, inadhi fa omiikwava nomamango ngoka haga tula ko omvula kehe. Dho odhi na oomwedhi moka hadhi tula ko ngaashi okutameka muAguste sigo Desemba. Shoka sha pumbiwa oonkondo neyitulemo, iiyimati oku yi eta po kayi na nando uudhigu.
“Okukuna iiyimati oshowo iikwamboga osha simana moonkalamwenyo dhetu, oshoka ohayi tu pe iikulya showo iiyimati tayi tungu yo oyi na uundjolowele,” ta kumagidha.
– vkaapanda@nepc.com.na