Omunashipundi gwoshitopolwa shaKavango East, Damian Maghambayi okwa ti oya tokola opo yaka kuutumbe kOtjiwarongo oku talulula ontengenekwa-thaneko yomumvo2017-2022 yoshitopolwa shawo, yeshi ningi opo ya ‘yande omapiyagano’ moRundu.
Aaleli yomombelelwa yoshitopolwa shaKavango Uzilo oya li ya gongala oshiwike shazi ko mOtjiwarongo moshitopolwa shaOtjozondjupa nelalakano oku talulula ontengeneko thaneko ndjoka tayi ya pehulilo muMaalitsa gwomumvo tagu ya.
“Konima yoonkundathana dhika elelo lyoshitopolwa otali keya po noshifolola shalyo shontengeneko-thaneko yiimalimumvo tayi hulile po2022-2027,” Maghambayi osho a hokolola sho a yi moonkundathana naNampa.
Ta ti oshinyolwa shoka yeya po nasho otashi ka kala tashi longithwa oku wilika iilonga yoshitopolwa shawo uule womimvo ntano, yo otayi ka kwatela wo moku talulula ngele oya adha tuu omathaneko gawo.
Ta gwedha po kutya uupyakadhi uunene mboka yali yatsakaneke ogo ngoka gwoCovid-19 ndjoka ya yi moshipala iilalakanenwa oyindji yali ta thanekwa oku ningwa pokati komuvo 2020 no2021.
Omashongo omakwao oga kwatela mo etalululo lyomutengenekwa thaneko gwoshimaliwa ngoka ohagu ningwa ethimbo lyapwa po kuuministeli tagu tonatele omalelo gopaitopolwa noshowo eyambulepo neputuko tali ende kashona momukunda unene moMuroro noNdiyona.
Sho a pulwa ngele oku ka ningila oonkundathana kOtjiwarongo otashi kotha iimaliwa oyindji yoshigwana Maghambayi okwa ti okwa ti oya tokola opo ya ze mo moshitopolwa shawo opo ya yande omapiyagano yo ya vule oku itula mo moshilalakanenwa shawo.
“Andola omutumba nguka owali wa ningilwa koRundu, oyendji yomutse andola inatu itula mo nawa oshoka eitulomo lyetu otali kala lya topolwa pokati omolwa iinakugwanithwa yopaumwene,” ta ti ngaaka.
Ta ti andola oya kuutumbile koRundu, andola ina ya vula oku gwanitha po shoka taya lalakanene oshoko iinakugwanithwa oyindji moRundu.
Kansela gwoshikandjohogololo shaRundu gwokuushayi Paulus Mbangu okwa ti oku shi uvite lela kutya omolwashike oku za mo mondoolopa noku ka ningila omitumba kondje tashi vulu oku kala inaashi talika ko nawa. Ta ti eekansela nadhi kale aluhe hadhi tula komeho oompumbwe dhaantu yawo. Okwa pula wo aaleli muuministeli ulilelepo iitopolwa opo ya kale haya tala koompumbwe dhiitopolwa ngele tadhi gandja iimaliwa. Ta ti oshitopolwa shawo osho shimwe shimiitopolwa moka muna oluhepo lwa shiga ko moshilongo. Omutumba nguka ogwa hulu mEtitano
– Nampa