Opolisi moshitopolwa shaShana oya kumagidha oshigwana shi kale tashi lefa ootaksi dhi na omandhindhiliko ngoka taga vulu okulandulwa kopolisi uuna pwa holoka sha.

Ndhoka okwa li dha popiwa komukuluntu gwopolisi moshitopolwa shaShana Naftal Lungameni Sakaria, sho a li a pulwa a tye ko sha kootaksi dhiifundja ndhoka tadhi yugu aantu iinima yawo moshitopolwa. 

“Otwa lopotelwa oshigwana tashi yugwa iinima yasho ngele taya lefa ootaksi. 

Ootaksi dhimwe kadhi li moshili onkene aafuthi otaya longitha ompito ndjoka okuyuga oshigwana omaliko gasho,’’ ta ti ngaaka.

Ta ti aantu yamwe miitopolwa yokonooli, inaya mangulukila we okulonda ootaksi omolwaafuthi mboka taya longo ongaahingi yootaksi, nelalakano lyokuyuga oshigwana.

“Oshigwana nashi kale aluhe sha kutha ko uuyelele awuhe tango omanga inaaya londa, mboka tau vulu okulongithwa kopolisi, oshoka olundji ohaya longitha oonomola dhoohauto dhiifundja,’’ ta kumagidha ngaaka. 

Oondoolopa dhomonooli ngaashi Ondangwa, Oshakati nOngwediva odha lopotwa dhi na aafuthi taya longitha oompito adhihe okuyuga oshigwana iinima yasho.

Opolisi moshitopolwa shaShana oya lopota omukiintu gwomimvo 26 a yugwa iinima ye sho a li a lefa otaksi yiifundja oshiwike sha zi ko. 

Omugandji gomauyelele gwopolisi Thomas Aiyambo moshitopolwa shaShana okwa hokolola kutya omukiintu ngoka okwa li a lefa a falwe kOneshila okuza kOnawa, nomohauto okwa adha mo aalumentu yane. 

“Omuhingi anuwa okwa li a hingi u uka kombinga yOshoopala, shoka sha li sha limbililike omukiintu ngoka nokulombwela omuhingi a kankame ihe okwa tindi. 

Anuwa aalumentu mboka ya li mohauto oye mu lombwele a gandje iinima ayihe, e taye mu

undula mo mohauto,” ta hokolola ngaaka.Omukiintu ngoka anuwa okwa li a kugu nokupula ekwatho moshigwana, omupya gwaafuthi ohauto yawo oya dhama lwoposikola pEhenye, aalumentu yaali oya kwatwa nayaali oya yi ontuku niinima ayihe ye mu kutha.

Natango oomwedhi dha yi, opolisi moshitopolwa shaShana oya lopota omulumentu gumwe nomukiintu ya yugwa iinima yawo sho kwa li ya londo otaksi okuza kOngwediva yu uka kOshakati.

Otaku hokololwa kutya sho kwa li ya lefa nokulonda ohauto ndjoka, okwa li ya adha aafalelwa yiifundja mohauto ye li yaali, gumwe oku li komeho omanga gumwe okonima.

Ta yi ti, ngoka a li komeho okwa li i ipopitha mongodhi, ta popi kutya ota ka pitula iinima ye kopate ndjoka yu uka kOshinyadhila.

Oya hokolola kutya, sho kwa li ya hingi oshinano oshile kashona okuza mOshakati okwa li ya mono ohauto ya kankamekwa, naalumentu mboka yaali okwa li ya nuka mo mohauto ya homata oombele pomake. 

Otaku hokololwa kutya okwa li ya pulwa ya gandje ashihe ye na, okuza koowili dhokiikeho, oongaku osho wo oongodhi dhopeke. 

Opolisi oya ti, okwa li ye ya pula yi itumine oshimaliwa koongondhi dhawo. 

Omulumentu gumw anuwa okwa li a tumu N$850 ndjoka oyo ashike ya li ko, omanga kombaanga yomukiintu kakwa li ku na sha.

Omuhingi gwotaksi mOshakati Simon Paulus okwa ti oombudhi otadhi ya yonene ongeshefa yawo, oshoka ookasitoma paife ohadhi kala dha tila mo miihauto yawo uunene ngele ya londeka aalumentu ashike.

“Thimbo limwe onda mono ashike ookasitoma dhaalumentu, nena sho to ka kankamena omukiintu iha londo we oshoka okwa tila aalumentu mboka ye li mohauto,” ta nyenyeta ngaaka. 

Ta ti, ootaksi nando nadhi tulwe omandhindhiliko natango oombudhi nadho otadhi tula ko omandhindhiliko giifundja.

-vkaapanda@nepc.com.na